«Օֆշորի» գործով կալանավորված Աշոտ Սուքիասյանին պատկանող ամբողջ ունեցվածքը՝ մեքենաներ, տներ, հանվել է աճուրդի: Այս մասին NEWS.am-ին ասաց մեղադրյալի փաստաբան Յուրիկ Խաչատրյանը:
Փաստաբանի խոսքով՝ 2009թ.-ին Աշոտ Սուքիասյանն էլ է ներդրումներ արել, սակայն կատարվածից հետո արգելանք է դրվել իր ամբողջ գույքի վրա:
«Սուքիասյանի նկատմամբ էլ են մախինացիաներ արվել, ինքն էլ է տուժել, Աֆրիկայում իմ պաշտպանյալին էլ են խաբել»,- նշեց Յուրիկ Խաչատրյանը:
Հիշեցնենք, որ դեռ 2009թ. էկոնոմիկայի նախարարության շենքում նախարար Ներսես Երիցյանի մոտ ՀՀ այդ ժամանակվա վարչապետ Տիգրան Սարգսյանի գլխավորությամբ հանդիպում-խորհրդակցություն էր կազմակերպվել 23 արդյունաբերական կազմակերպությունների ղեկավարների հետ, որի ժամանակ քննարկվել էր Ռուսաստանի՝ Հայաստանին տրամադրված 500 միլիոն դոլարի վարկը, որից 100 միլիոնը Ռուսաստանը պետք է տար ապրանքային տեսքով՝ ադամանդի հումքով։ Իսկ այդ 100 միլիոնի վարկը պետք է բաժանվեր այդ 23 կազմակերպությունների միջեւ, որպեսզի դրանք սկսեին աշխատել։ Գործարար Փայլակ Հայրապետյանն առաջարկել էր գրավադրել իր 33 մլն դոլար արժողությամբ իր ամբողջ անշարժ գույքը եւ «Ամերիաբանկը»-ից ստացված մոտ 10 միլիոն դոլարը տվել Աշոտ Սուքիասյանին, որն էլ վերցնելով գումարը՝ փախել էր երկրից: 2014թ. փետրվարին Աշոտ Սուքիասյանին հայտնաբերել էին Վրաստանում: Հունիսի 19-ին՝ Վրաստանից Հայաստան արտահանձնվելուց անմիջապես հետո, Աշոտ Սուքիասյանը կալանավորվել էր: