Մալայզիայում սոցցանցերի գրառումները կօգտագործվեն որպես «լուրջ ապացույց»` ահաբեկչական գործունեության մեջ մեղադրվողների գործերը քննելիս: Այս մասին հայտարարել է թագավորության ներքին գործերի նախարար Ահմադ Զահիդ Համիդին:
Ըստ նրա` ներկայումս երկրում օրենք է գործում, որը թույլ է տալիս որպես ապացույց օգտագործել սոցցանցերով տարածվող բոլոր տեղեկությունները: Սակայն դա վերաբերում է միայն որպես ավազակություն դասակարգվող հանցագործություններին:
Միաժամանակ, ընդգծել է նախարարը, նման բան արվում է նաեւ հակաահաբեկչական պայքարն ուժեղացնելու համար, փոխանցում է ՏԱՍՍ-ը:
Վերջին ժամանակներս Մալայզիայի իշխանությունները ձերբակալել են տասը մարդու, որոնք կասկածվում են ԻՊ-ի համար գրոհայիններ հավաքագրելու մեջ: Նշվում է, որ ԻՊ կողմնակիցներն ակտիվ օգտագործել են Facebook-ը եւ մի շարք այլ սոցցանցեր: Մալայզիայի իշխանությունները մի ժամանակ ծրագրել էին լիովին փակել Facebook-ի հասանելիությունը երկրի տարածքում, սակայն վերջնարդյունքում որոշել են հրաժարվել այդ քայլից: Մալայզիայում համացանցից օգտվողների թիվը շուրջ 19,2 միլիոն է:
