Եթե Ադրբեջանը հարկ համարի, ապա թույլ կտա վերցնել խոցված ուղղաթիռի հայ օդաչուների մարմինները: «ԱՊԱ»-ի փոխանցմամբ՝ «Հայ-ադրբեջանական Լեռնային Ղարաբաղի հակամարտություն. աշխարհը պետք է իմանա ճշմարտությունը» թեմային նվիրված միջացառմանը նման հայտարարությամբ է հանդես եկել Ադբեջանի Ռազմագերիների, պատանդների եւ անհայտ կորածների հարցերով պետական հանձնաժողովի աշխատանքային խմբի ղեկավար Ֆիրուդին Սադիգովը:
Խոսելով խոցված հայկական ուղղաթիռի մասին՝ աշխատանքային խմբի ղեկավարը նշել է, որ այն կործանվել է ադրբեջանական տարածքում: «Զոհվածների մարմինները մնացել են այնտեղ եւ ոչ մի կողմին չի հաջողվել վերցնել դրանք: Հայերը աղաչում են Անջեյ Կասպշիկին, բայց վերջինս չունի այդ իրավասությունները: Եթե Ադրբեջանը հարկ համարի, թույլ կտա վերցնել մարմինները»: Հատկանշական է Սադիգովի կողմից օգտագործված «այնտեղ» բառը: Ավելին, դրան հաջորդում է «Կողմերից ոչ մեկին չի հաջողվել վերցնել դրանք» պարզաբանումը: Այլ խոսքով՝ պետպաշտոնյան խոստովանել է, որ ուղղաթիռն ընկել է չեզոք տարածքում:
Սադիգովը նաեւ չի շրջանցել ադրբեջանցի դիվերսանտների գործով դատական գործընթացը:
«Նրանցից մեկը Հասանն էր, որին սպանել են եւ երկար ժամանակ մարմինը չեն փոխանցել: Բոլոր միջազգային կազմակերպությունները զարմանում էին, թե ինչու են հայերն այդպես վարվում: Նրանք սպանվածի ինքնության մասին տվյալներ էին պահանջում՝ որ դպրոցում է նա սովորել, որտեղ է աշխատել», - հայտարարել է Սադիգովը:
Ավելի վաղ, Ադրբեջանի նախագահն անձամբ է հիշատակել «խիզախ ադրբեջանցի մարտիկի մասին»՝ չնշելով, սակայն, անունը, ում մարմինը երկար ժամանակ չեն կարողացել հետ ստանալ:
Սա եւ մի շարք այլ հայտարարություններ պարզաբանում են ադրբեջանական կողմի իրական դիրքորոշումը՝ վրեժ լուծել՝ առանց հաշվի առնելու իրական դրությունն ու հանգամանքները: Վրեժ լուծել, ցանկացած հնարավոր դեպքում:
