Հուլիսի 2-ին ՀՀ ԱԺ նախագահ Հովիկ Աբրահամյանը հրավիրել էր աշխատանքային խորհրդակցություն, որին մասնակցել են ԵԽԽՎ-ում, ԵԱՀԿ խորհրդարանական վեհաժողովում եւ Արեւելյան գործընկերության խորհրդարանական վեհաժողովում` «Եվրանեսթում» ՀՀ Ազգային ժողովի պատվիրակությունները:
Ինչպես NEWS.am-ը տեղեկանում է ՀՀ ԱԺ մամուլի ծառայությունից, խորհրդակցության ժամանակ ԱԺ նախագահը նշեց, որ նման ձեւաչափով հանդիպման նպատակն է քննարկել եվրոպական խորհրդարանական կառույցներում ԱԺ պատվիրակությունների աշխատանքը, նպաստել համակարգված քաղաքականության մշակմանը Հայաստանի համար կարեւորագույն հարցերում, լսել առաջարկներ, տեսակետներ աշխատանքները առավել արդյունավետ եւ գործնական դարձնելու նպատակով:
Պատվիրակությունների ղեկավարներ Դավիթ Հարությունյանը, Արամ Սաֆարյանը եւ Վահան Հովհաննիսյանը խոսել են կատարված աշխատանքի մասին, տեսակետներ հայտնել եւ առաջարկներ ներկայացրել պատվիրակությունների գործունեությունը ավելի արդյունավետ կազմակերպելու վերաբերյալ:
Ամփոփելով խորհրդակցությունը` ԱԺ նախագահ Հովիկ Աբրահամյանը համոզմունք է հայտնել, որ նման ակտիվ եւ շահագրգիռ քննարկումները անպայման դրական արդյունք կունենան եւ հավաստել, որ բոլոր կարեւոր առաջարկությունները կներկայացվեն ՀՀ նախագահին:
Հովիկ Աբրահամյանն առաջարկել է յուրաքանչյուր խորհրդարանական վեհաժողով մեկնելուց մեկ շաբաթ առաջ իր ղեկավարությամբ կազմակերպել քննարկում պատվիրակությունների անդամների եւ ԱԳՆ ներկայացուցչի մասնակցությամբ: