Առնվազն ծիծաղելի է, երբ Ադրբեջանի իշխանությունները խոսում են միջազգային իրավունքի մասին. սա զավեշտալի է հնչում ադրբեջանական կողմից խոցված ուղղաթիռի ֆոնին։ Այս մասին NEWS.am-ի թղթակցին ասաց ՀՀ ԱԺ փոխխոսնակ Էդուարդ Շարմազանովը՝ մեկնաբանելով Ադրբեջանի Միլի Մեջլիսի փոխխոսնակ Բահար Մուրադովայի խոսքերն այն մասին, որ «նախագահ Սերժ Սարգսյանի ելույթը միջազգային իրավական սկզբունքների անտեսում է եւ միլիտարիստական դիրքորոշման հերթական փաստը»։
«Նախեւառաջ, ամեն ինչ զավեշտալի է, որովհետեւ վերջին օրերին Ադրբեջանի իշխանությունները եւս մեկ անգամ ապացուցեցին, որ ոտնահարում են միջազգային եւ համամարդկային բոլոր նորմերը։ Մուրադովայի շուրթերով Ադրբեջանը փորձում է իրավիճակը ներկայացնել որպես Հայաստանի եւ Ադրբեջանի միջեւ տարածքային վեճ, ինչը չի համապատասխանում իրականությանը ոչ միայն իմ խոսքերով, այլեւ համաձայն ԵԱՀԿ Մինսկի խմբի»,- հայտարարել է Շարմազանովը։
Ըստ նրա՝ Մուրադովան շոշափել է «օկուպացված տարածքների» թեման. «Այո, իրոք կան օկուպացված տարածքներ՝ Գետաշենը, Մարտունաշենը եւ Մարտակերտի մի մասը, եւ օկուպանտն է Ադրբեջանը։ Տիկին Մուրադովան նշում է, որ Սերժ Սարգսյանի ներկայությունը զորավարժություններին զավթողականություն էր՝ մոռանալով, որ Հայաստանը եղել եւ մնում է ԼՂՀ անվտանգության երաշխավորը, քանի դեռ Լեռնային Ղարաբաղի Հանրապետությունը չի ճանաչվել միջազգային մակարդակով։ Հայաստանն Ադրբեջանի իշխանություններին թույլ չի տա ղարաբաղյան հարցը լուծել խաղաղությունից բացի այլ ճանապարհով»։
Շարմազանովը նաեւ համոզմունք է հայտնել, որ Մուրադովայի հայտարարությունը ոչ այլ ինչ է, քան Ադրբեջանի իշխանությունների խուճապի ապացույց՝ ԼՂՀ ծավալային զորավարժություններից հետո. «Պաշտոնական Բաքվի խուճապը մեծացրել է հայ օդաչուների մարմինների տարհանման հատուկ գործողությունը։ Այդ հայտարարությունը Ադրբեջանի իշխանությունների՝ փրփուրներից կախվելու փորձն է։ Իմ պատասխանն անձամբ տիկին Մուրադովային չի հասցեագրված, ես ջենթլմեն եմ, հասցեատերը Ադրբեջանի իշխանություններն են»։
