Անդամակցելով Եվրասիական տնտեսական միությանը` ոչ միայն Հայաստանի տնտեսությունն է ստանալու հնարավորություններ, այլեւ մեր քաղաքացիներն ու ծառայությունների ոլորտը: Այս մասին այսօր` նոյեմբերի 26-ին, լրագրողների հետ զրույցում ասաց Ազգային ժողովի ՀՀԿ խմբակցության պատգամավոր Գագիկ Մինասյանը:
ՀՀԿ-ական պատգամավորը ներկայացրեց, թե ինչ առավելություններ ենք մենք ստանալու` անդամակցելով ԵՏՄ-ին:
«Առաջին հերթին ԵՏՄ-ն ընդգծված տնտեսական է, սա կարեւոր պնդում է այն քաղաքացիների համար, ովքեր կարծում էին, թե մենք մեր անկախության հետ խնդիրներ կունենանք` անդամակցելով այս միությանը: Երկրորդ` այս անդամակցությունը տալիս է մեծ հնարավորություններ, առանց որեւէ արգելքի` մենք կարտահանենք մեր ապրանքը մեծ շուկա: Մեր առջեւ մեծ հեռանկարներ են բացվելու: Երրորդ` այս գործընթացի ընթացքում մենք արդեն ձեռք ենք բերել արտոնություններ, օրինակ` գազի սակագնի, նավթամթերքի եւ չմշակված ադամանդի հետ կապված պայմանագրերը»,- ասաց պատգամավորը:
Գագիկ Մինասյանի խոսքով` Հայաստանի` ԵՏՄ-ին անդամակցելու պայմանագիրն արդեն խորը քննարկվել է խորհրդարանում: ԱԺ լսումների ժամանակ, պատգամավորի կարծիքով, սպառիչ պատասխաններ են տրվել հասարակության եւ քաղաքական գործիչների հետաքրքրող հարցերին:
«Մեր ստարտային պայմաններն ամենանպաստավորն են, եւ եթե մենք չօգտագործենք մեզ ընձեռնված արտոնությունները, ապա այլ երկրներ մեզ կանցնեն»,- ավելացրեց նա:
Նշենք, որ նախատեսվում է, որ հունվարի մեկից Հայաստանը կդառնա ԵՏՄ անդամ:
