ՆԱՏՕ-ի խորհրդարանական վեհաժողովի քաղաքական հանձնաժողովում քննարկումների ժամանակ ադրբեջանցիները փորձել են մեղադրել հայկական կողմին ղարաբաղյան ուղղաթիռի խոցման միջադեպի հետ կապված, հայտարարելով, որ դա հայկական կողմի սադրանքն էր, որին տրվել է համարժեք պատասխան: Այս մասին NEWS.am-ի թղթակցի հետ զրույցում նշեց ՆԱՏՕ-ի ԽՎ-ում հայկական պատվիրակության անդամ, «Ժառանգություն» խմբակցության քարտուղար Թեւան Պողոսյանը:
Նրա խոսքով՝ ՆԱՏՕ-ի ԽՎ-ում հայկական պատվիրակության ղեկավար Կորյուն Նահապետյանը հարց է ուղղել Դաշինքի գլխավոր քարտուղարին այդ միջադեպի հետ կապված: «Դրանից մեկ օր առաջ ՆԱՏՕ-ի ՎԽ-ի քաղաքական հանձնաժողովում քննարկման ժամանակ ադրբեջանցիները փորձել են մեղադրել մեզ՝ հայտարարելով, որ դա հայկական կողմի սադրանքն էր, որին տրվել է համարժեք պատասխան: Նահապետյանն ընդգծել է, որ չնայած բոլոր կոչերին, միջազգային հանրությունը չի ձեռնարկել ոչինչ, քանի որ չի ցանկացել իրերը կոչել իրենց անուններով, բայց ԼՂՀ Զինված ուժերը պատվով են կատարել իրենց առջեւ դրված խնդիրը»,-նշել է Թեւան Պողոսյանը:
Հիշեցնենք, որ նոյեմբերի 12-ին Ադրբեջանի զինված ուժերը խոցել են ԼՂՀ զինված ուժերին պատկանող ռազմական «Մի-24» ուղղաթիռը, որն այդ պահին ուսումնավարժական թռիչք էր իրականացնում: Երեք օդաչուները զոհվել են: Դեպքից 10 օր անց հայկական կողմը հատուկ գործողություն է իրականացրել եւ դեպքի վայրից դուրս բերել զոհված տղաների մարմիններն ու ուղղաթիռի անհրաժեշտ մասերը:
