Եթե խորհրդարանական եռյակի («Բարգավաճ Հայաստան», ՀԱԿ եւ «Ժառանգություն») օրակարգում իշխանափոխության հարցը մնա, «Ժառանգություն»-ը չի լքի այն: Այս մասին NEWS.am-ի թղթակցի հետ զրույցում հայտարարեց «Ժառանգություն» կուսակցության վարչության փոխնախագահ Արմեն Մարտիրսյանը՝ մեկնաբանելով այն փաստը, որ Ազգային ժողովի հերթական լիագումար նստաշրջանի ընթացքում դեկտեմբերի 4-ին ԲՀԿ-ի եւ ՀԱԿ-ի պատգամավորները (բացառությամբ Նիկոլ Փաշինյանի) կողմ քվեարկեցին Եվրասիական տնտեսական միությանը Հայաստանի անդամակցության մասին պայմանագրի վավերացմանը:
«Խնդիրը մեր գործընկերների մեջ չէ, այլ իշխանության: Այն իշխանության, որը հանգեցրեց նրան, որ այսօր ապրանքները մեր երկրում ժամ առ ժամ թանկանում են, պետությունը կործանվում է: Եվ եթե մենք ցանկանում ենք որեւէ բան փոխել, այլ ճանապարհ չունենք, քան ամբողջական իշխանափոխությունը»,- հայտարարեց Մարտիրոսյանը:
Ճշտող հարցին, ԵՏՄ-ին Հայաստանի անդամակցության հետ կապված տարաձայնություններն արդյո՞ք չեն հանգեցնի «եռյակի» ձեւաչափի զրոյացմանը, «Ժառանգության» վարչության փոխնախագահը պատասխանեց, որ այդ հարցի շուրջ տարաձայնություններ եղել են՝ սկսած անցյալ տարվա սեպտեմբերի 3-ից:
«Սեպտեմբերի 4-ին մենք արդեն հայտարարեցինք, որ մեզ համար անընդունելի է ոչ լեգիտիմ իշխանության արած քայլը, մենք դա արեցինք նաեւ 2014 թվականի հոկտեմբերի 10-ին՝ դատապարտելով Սերժ Սարգսյանի ստորագրությունը: Հետեւաբար, այս իրավիճակը միշտ է տեղ ունեցել: Դա չի ազդում իշխանափոխության խնդրի վրա: Մենք պետք է իշխանափոխություն կատարենք, որպեսզի շտկենք ներկա իրավիճակը»,- ասաց Արմեն Մարտիրոսյանը:
Հայաստանի Ազգային Ժողովը դեկտեմբերի 4-ին հերթական լիագումար նիստի ընթացքում ձայների ճնշող մեծամասնությամբ վավերացրեց Եվրասիական տնտեսական միությանը երկրի անդամակցության մասին պայմանագիրը: Դրա վավերացմանը «կողմ» քվեարկեց 103 պատգամավոր, «դեմ»՝ 7, 1 հոգի՝ ձեռնպահ: ԲՀԿ-ն եւ ՀԱԿ-ն առաջին անգամ բացահայտ աջակցեցին եվրասիական ինտեգրմանը: