Ակնկալվում է, որ կառավարությունն իր այսօրվա՝ հուլիսի 8-ի նիստում Սերգեյ Բագրատյանին կնշանակի Վայոց ձորի մարզպետ: Այս մասին NEWS.am-ի թղթակցի հետ զրույցում քիչ առաջ հայտնեց «Բարգավաճ Հայաստան» կուսակցության ղեկավար Գագիկ Ծառուկյանի մամուլի խոսնակ Խաչիկ Գալստյանը: Ի դեպ, մարզպետի ԲՀԿ թեկնածուն այժմ կառավարությունում է, ուր տեղի է ունենում կառավարության հերթական նիստը:
Նշենք, որ կառավարությունն իր նախորդ երկու նիստերի ընթացքում այդպես էլ օրակարգում չէր ընդգրկում Վայոց ձորի մարզպետի նշանակման հարցը: Բագրատյանին չնշանակելու պատճառն, ըստ շրջանառվող լուրերի կապված էր այն բանի հետ, որ նրա թեկնածությունը չէր արժանացել կառավարության ղեկավարի հավանությանը, եւ Տիգրան Սարգսյանն առաջարկել էր այլ թեկնածուի առաջադրել։ Խաչիկ Գալստյանն ասաց, թե Բագրատյանի նշանակման ուշացումը պայմանավորված է ընթացակարգային խնդիրներով:
Նկատենք, որ Վայոց ձորի մարզպետի թեկնածուն գործարար է եւ ղեկավարում է հեղուկ վառելիքի եւ սննդի առեւտրով զբաղվող «Սերգեյ Գրուպ» ընկերությունը:
Հիշեցնենք, որ Վայոց ձորի նախկին մարզպետը Վարդգես Մաթեւոսյանն էր, ով հունիսի 12-ին հանկարծամահ էր եղել: