Գյումրիում՝ Մյասնիկյան փողոցի տներից մեկում, որտեղ սպանել էին ընտանիքի 6 անդամներին, հայտնաբերել են մի քանի ամսական մի երեխայի: Նրան տեղափոխել են հիվանդանոց: NEWS.am-ի թղթակցի հետ զրույցում Գյումրիի Ավստրիական մանկական հիվանդանոցի տնօրեն Աշոտ Կուրղինյանն ասաց, որ երեխային բերել են ծայրահեղ ծանր վիճակում, նրա կրծքավանդակի շրջանում, կտրած-ծակած վերք էր, այժմ վիրահատում են: Երեխային գտել են մոր դիակի վրայից, երեւի ոճրագործին թվացել է, թե նա եւս մահացած է, մինչդեռ երեխան շնչելիս է եղել: Որեւէ այլ փաստաթուղթ կամ տվյալ առայժմ հայտնի չէ:
NEWS.am-ի տեղեկություններով՝ ոճրագործության մեջ կասկածվողը այժմ փախուստի մեջ է, նրա մոտ զենք կա:
Ավելի վաղ NEWS.am-ը գրել էր, որ ողբերգություն է տեղի ունեցել Գյումրիում: Մյասնիկյան փողոցի տներից մեկում ընտանիքի անդամներին գտել էին սպանված: Նրանց վրա հրազենային վնասվածքներ են եղել: -Սպանվածներից հինգը չափահաս են եղել, մեկը՝ մանկահասակ երեխա: Այս տեղեկությունը հաստատել էին ոստիկանությունից՝ առանց մանրամասներ հայտնելու: Այս պահին դեպքի վայրում իրավապահներ են աշխատում: