Տեսանելի ապագայում Ռուսաստանն այլ երկրներից ձկան նոր մատակարարումների կարիք կունենա: Այս մասին NEWS.am-ի թղթակցի հետ զրույցում հայտնեց Ծովամթերքի արտահանման նորվեգական խորհրդի շուկայի վերլուծաբան Փոլ Անդալը:
Նրա խոսքով, նորվեգական ձկան բացակայության պատճառով ռուսական շուկայում այն չի բավականացնի:
«Այդ պատճառով կարծում եմ, որ Ռուսաստանի շուկայում հսկայական հնարավորություններ են բացվում այն երկրների համար, որոնց ռուսական էմբարգոն չի առնչվում»,- հավելեց Անդալը: Իսկ ռուսական ձկնաբուծական արտադրությանը, ըստ նրա, դժվար թե հաջողվի լրացնել բացը:
Ավելի վաղ ռուսական լրատվամիջոցների հետ զրույցում Ձկան շուկայի արդյունաբերող եւ առեւտրային ձեռնարկությունների ասոցիացիայի գործադիր տնօրեն Ալեքսեյ Արոնովը նշել էր, որ նորվեգական սաղմոնը զբաղեցնում է Ռուսաստանի Դաշնության սառեցված ձկան շուկայի 95%-ը, եւ այդ բացը լրացնել չի հաջողվի:
Միաժամանակ, ՌԴ գյուղատնտեսական նախարար Նիկոլայ Ֆյոդորովը հայտարարել էր, որ Ռուսաստանը կարող է ստեղծված բացը լրացնել՝ արտահանման-ներմուծման դրական հավասարակշռության շնորհիվ (համապատասխանաբար 1.8 մլն եւ 600-700 հազար տոննա):
Նշենք, որ Ռուսաստանը Հայաստանի ձկնամթերքի արտահանման հիմնական շուկան է: 2014 թվականի առաջին երեք եռամսյակներում Հայաստանից 1635 տոննա թարմ եւ սառեցված ձուկ է արտահանվել, ամբողջը՝ Ռուսաստան:
