Երեւանում, հունվարի 30-ին, «Դալմա գարդեն մոլ»-ում գտնվող «Սինեմա սթար» կինոթատրոնում (Երեւան, Ծիծեռնակաբերդի խճուղի, 3 շենք, 2-րդ հարկ) կկայանա գերմանաբնակ թուրք ռեժիսոր, Վենետիկի փառատոնի մրցանակակիր Ֆաթիհ Աքինի նոր` «Սպի» ֆիլմի փակ դիտումը լրատվամիջոցների ներկայացուցիչների համար, որին հաջորդելու է մամլո ասուլիս՝ ռեժիսոր Ֆաթիհ Աքինի, սցենարի համահեղինակ Մարտիկ Մարդինի, դերասանուհի Արեւիկ Մարտիրոսյանի, ֆիլմի համապրոդյուսերներ Ռուբեն Դիշդիշյանի եւ Արամ Մովսեսյանի մասնակցությամբ:
Ֆիլմի փակ դիտումը՝ ժամը 13:00, մամլո ասուլիսի սկիզբը՝ ժամը 15:20:
«Սպի» ֆիլմի գործողությունները տեղի են ունենում 1915 թ.` Հայոց ցեղասպանության ժամանակ: Գլխավոր հերոսը` Նազարեթ Մանուկյանը, կորցնում է ընտանիքը, իսկ տարիներ անց պարզում, որ իր երկվորյակ դուստրերը հավանաբար փրկվել են: Հայրը մեկնում է փնտրելու իր զավակներին…
15,5 մլն եվրո բյուջեով եւ 138 րոպե տեւողությամբ «Սպի» դրամայի նկարահանումները սկսվել են 2013 թ. մարտին եւ իրականացվել են Հորդանանում, Գերմանիայում, Կուբայում եւ Մալթայում: Ժապավենի պրոդյուսերների թվում են հայազգի Ռուբեն Դիշդիշյանը եւ Արամ Մովսեսյանը:
Ֆիլմի ստեղծմանը ֆինանսական աջակցություն է ցուցաբերել նաեւ Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովը:
Ֆիլմում դերերով հանդես են եկել Արսինե Խանջյանը, Սիմոն Աբգարյանը, Արեւիկ Մարտիրոսյանը, Ակին Գազին, իսկ գլխավոր հերոսին մարմնավորել է ֆրանսիացի (ծագումով ալժիրցի) դերասան Թահար Ռահիմը, ով աչքի է ընկել Ժակ Օդիարի «Մարգարեն» ֆիլմում:
Սցենարի հեղինակներն են հենց ռեժիսորը՝ Ֆաթիհ Աքինը եւ Մարտիկ Մարդինը, ով նաեւ Մարտին Սկորսեզեիի ֆիլմերի սցենարներն է հեղինակել:
«Սպի» ֆիլմն ամփոփում է Ֆաթիհ Աքինի «Սեր, մահ եւ չարք» եռապատումը: Այն ռեժիսորի առաջին մեծ միջազգային նախագիծն է, որի արտադրությանը մասնակցել է 7 երկիր` Գերմանիան, Ֆրանսիան, Իտալիան, Կանադան, Լեհաստանը, Թուրքիան եւ Ռուսաստանը:
