Parking City ընկերությունը շարունակում է իր գրպանահատ գործունեությունը, որովհետեւ հունվարի 22-ին մեր 5 աշխատակիցներից մեկն էլ է ստացել տուգանքի մասին արձանագրություն: Այս մասին Երեւանի քաղաքապետ Տարոն Մարգարյանին ուղղված նամակում գրել է Երեւանի ավագանու «Բարեւ Երեւան» խմբակցության ղեկավար Անահիտ Բախշյանը:
Նա իր նամակում, մասնավորապես, նշել է.
«Նախորդ օրվա տարածածս «Parking City-ին`գրպանահատ» մամուլի հաղորդագրության հետ կապված պարզաբանումներ ստանալու նպատակով զանգահարել եմ 060 60 66 06 հեռախոսահամարով: Հեռախոսով խոսող ձայնը երկար բարակ բացատրում է, թե ո՞ր խնդրով հեռախոսի ո՞ր թիվը սեղմի քաղաքացին եւ նույն ձայնը զգուշացնում է, որ 5 րոպեից ավել կանգնելու դեպքում պետք է վճարել տեղական տուրք:
Իհարկե ինձ, ինչպես նաեւ ցանկացած քաղաքացու, այդպես էլ չհաջողվեց մի կենդանի աշխատակցի հետ խոսել ու պարզաբանումներ ստանալ:
Արդեն մի քանի ամիս է, որ վճարովի ավտոկայանատեղում տուրքը վճարում են 15 րոպեից ավելի կանգնելու համար, իսկ Parking Sity-ի տեղեկատու հեռախոսով խոսող ձայնը շարունակում է հաղորդել հին կարգը:
Հիմա ի՞նչ անուն տաս այս կազմակերպության կառավարիչներին, եթե ոչ՝ անօրինականության կամ անգրագիտության ու ծայրահեղ թափթփվածությամբ գործող կազմակերպություն, որը գործ ունի շա՜տ մեծ թվով քաղաքացիների շահերը ոտնահարելու հետ, բայց երբեք չի առերեսվում նրանց հետ եւ չի լսում մեզ՝ քաղաքացիներիս: Ավելին, շարունակում է իր գրպանահատ գործունեությունը, որովհետեւ հունվարի 22-ին մեր 5 աշխատակիցներից մեկն էլ է ստացել տուգանքի մասին արձանագրություն:
Այս հաղորդագրությունը տարածելուց 15 րոպե առաջ Երեւանի քաղաքապետարանի եւ Parking Sity-ի ներկայացուցչի հետ հանդիպեցինք Տիգրան Մեծ պողոտայի 7-րդ հատվածում եւ նրանք տեղում համոզվեցին, որ այդ հատվածը վճարովի ավտոկայանատեղիի համար կահավորված չէ, ասեցին՝ սխալվել ենք:
Պահանջում ենք անմիջապես նոր կարգին համապատասխանեցնել Parking Sity-ի հեռախոսով ձայնագրվածը եւ նրանք, ովքեր անհիմն կերպով անհանգստացրել են մեր քաղաքացիներին, հրապարակավ ներողություն խնդրեն»:
Parking City-ին` գրպանահատ. Անահիտ Բախշյանի հայտարարությունը
