Առաջիկա շաբաթ հնարավոր է՝ Ազգային ժողովում արտահերթ նիստ հրավիրվի: Այս մասին այսօր՝ փետրվարի 26-ին, ասաց ԱԺ նախագահ Գալուստ Սահակյանը՝ «Շահութարկի մասին» օրենքի փոփոխությունների քննարկելիս:
«Վարդան Այվազյանին հորդորում եմ հաջորդ շաբաթ մի քանի քննարկում կազմակերպել այն պատգամավորների հետ, որոնց այս օրենքը հետաքրքրում է: Այնպես ստացվեց, կամ այնպես մտածվեց, որ քվեարկությունը կհետաձգվի մի ավելի պատեհ ժամանակ: Խնդրում եմ, նստեք ու քննարկեք, սա վատ օրենք չէ, առանց խոսափողերի քննարկեք: Կան օրենքներ, որոնց համար հնարավոր է մարտի 3-4-ին արտահերթ հրավիրվի: Հետեւաբար, առաջարկում եմ շահութահարկի օրենքի վերաբերյալ քննարկումներ անել»,- ասաց ԱԺ նախագահը:
Սա էլ, սակայն, ընդդիմադիր պատգամավորներին չբավարարեց: Նրանք շարունակեցին աղմկել, ինչին Գալուստ Սահակյանն արձագանքեց. «Դուք ոչ միայն ոտքից չեք թոփալ, դուք նաեւ ականջից եք թոփալ: Ես բոլոր շշուկները լսում եմ: Ձեզ որտեղ հասնում է, այնտեղ խոսում եք եւ ապտակը ստանում եք»:
Նշենք, որ օրենքով հարկը ծրագրվում է նվազեցնել 20-ից 2 տոկոսի, բայց միայն այն ընկերությունների համար, որոնք տարեկան 50 մլրդ դրամից (105 մլն դոլար-խմբ.) ավելի են արտահանում։