![](img/news/25/44/81/default.jpg)
Ազգային ժողովի ՀԱԿ խմբակցության քարտուղար Արամ Մանուկյանը համոզված է, որ նախորդ երկու տարիներին Հանրային հեռուստաընկերության եթերում ոչ մի անգամ «Հայ ազգային կոնգրեսի» որեւէ ներկայացուցիչ չի հայտնվել:
Այսօր՝ փետրվարի 26-ին, Արամ Մանուկյանը խորհրդարանում Հեռուստատեսության եւ ռադիոյի ազգային հանձնաժողովի նախագահ Գագիկ Բունիաթյանից հետաքրքրվեց, թե արդյոք վերջինը նման դեպք հիշում է, թե ոչ:
«Չեմ կարող հստակ պատասխանել, բայց դուք պետք է եթերում հայտնված լինեիք: 2-3 տարի ղեկավարել եմ Հանրային հեռուստաընկերությունը, եւ դուք լավ ներկայացված եք եղել, այդ տարիների համար կարող եմ գոնե վստահ ասել: Ձեր նշած ժամանակահատվածի համար կարող եմ ճշտել եւ ասել»,- ասաց Գագիկ Բունիաթյանը, որն այսօր ներկայացնում է 2013թ.-ի գործունեության մասին հաղորդումը:
Արամ Մանուկյանը, սակայն, հակադարձեց՝ նշելով, որ բացարձակապես ոչ մի հրավեր չի եղել Հ1-ից:
«Եվ հետո պետք է կոչել Հանրապետականների հեռուստաընկերություն»,- ասաց ընդդիմադիր պատգամավորին, ինչին Գագիկ Բունիաթյանը միայն ասաց. «Բան չասացի»:
Արամ Մանուկյանի հարցին, թե հնարավոր է ՀԱԿ-ի նախաձեռնած հանրահավաքի վերաբերյալ իրենց հայտարարությունը հայտնվի եթերում, Բունիաթյանը պատասխանեց. «Եթե օրենքով դա հստակ է, մենք պատրաստ ենք աջակցել եւ ձեր հայտարարությունը կհայտնվի մեր եթերում»: