Ադրբեջանական լրատվամիջոցները ԵԱՀԿ Մինսկի խմբի ամերիկացի համանախագահ Ջեյմք Ուորլիքին են վերագրել մի բան, որի մասին նա չի խոսել: Ուորլիքը Twitter-ում հաճախ է կիսում տպավորությունները: Այս անգամ էլ ամերիկացի դիվանագետը գրել է. «Այս օրերը հիշատակման օրեր են: Մահերն ու ողբերգական իրադարձությունները շարունակում են ցավի աղբյուր մնալ, հաշտության ժամանակն է»: Իսկ ադրբեջանական լրատվամիջոցները, ինչպես միշտ, բոլորովին այլ բան են հասկացել:
Մեկ կայքի օրինակով ներկայացնենք, թե ինչպես են այն ներկայացրել ադրբեջական քարոզչամեքենայի գաղափարախոսները: «Ուորլիքը՝ Խոջալուի ողբերգության մասին» վերնագրով տեղեկության մեջ, մեջբերելով համանախագահին, գրել են. «Խոջալուի իրադարձությունների հերթական տարելիցը վկայում է այն մասին, որ ղարաբաղյան հակամարտության կողմերը պետք է հաշտվեն»:
Ադրբեջանական քարոզչամեքենան այնքան է խճճվել, այսպես կոչված, «Խոջալուի ցեղասպանության» մասին սեփական ստի ցանցում, որ իր «հանճարեղ» մտքերը վերագրում է դիվանագետներին, որոնք Twitter-ում կամ Facebook-ում գրառումներ են կատարում ոչ թե հանուն ժամանցի, այլ իրենց մտքերը կողմերին հասցնելու համար:
Սակայն ադրբեջանական կողմը հերթական անգամ այն յուրովի է մեկնաբանում՝ բարձրաստիճան դիվանագետի Twitter-ը յուրովի օգտագործելով: Ադրբեջանցիների ապատեղեկատվությունը վնաս է հասցնում ղարաբաղյան հակամարտության կարգավորմանը: Եվ խնդիրը միայն սոցիալական ցանցերի մեջ չէ:
