Արմավիրի մարզի Մեծամոր քաղաքի բնակչուհի, հղիության 5-րդ ամսում անցած տարվա ամռանը մահացած 28-ամյա Նարինե Շարոյանի ամուսինը՝ Գագիկ Մինասյանը, միայն մեկ ցանկություն ունի՝ մեղավորները պատժվեն: Այս մասին NEWS.am-ին ասաց Գագիկ Մինասյանը:
Նրա խոսքով՝ իրենք հետեւում են քննության ընթացքին, ծանոթ են փորձաքննությունների պատասխաններին եւ այժմ սպասում են, որ դատարանն արդարացի վճիռ կայացնի:
Մեր հարցին, թե արդյոք այս ընթացքում գործով մեղադրյալ, գինեկոլոգ-մանկաբարձ Հասմիկ Հակոբյանը կամ հիվանդանոցի տնօրինությունն այցելել է Նարինեի հարազատներին, օգնություն առաջարկել, Գագիկ Մինասյանը պատասխանեց. «Ոչ, ոչ մի անգամ չեն եկել, չեն տեսել: Ընտանիքս քանդել են»:
Նշենք, որ փետրվարի 27-ին Հասմիկ Հակոբյանին մեղադրանք է առաջադրվել ՔՕ 130-րդ հոդվածի 2-րդ մասով, այն է՝ բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ կամ մարդու իմունային անբավարարության վարակի հարուցիչով վարակում: Բժշկուհու նկատմամբ խափանման միջոց է ընտրվել ստորագրություն չհեռանալու մասին:
Հիշեցնենք, որ 2014 թվականի հուլիսի 7-ին ստացվել էր քաղաքացի Գ.Մինասյանի հաղորդումը, որ իր կինը՝ Նարինե Շարոյանը, հունիսի 28-ին «Արմավիր» բժշկական կենտրոնում վիրահատության էր ենթարկվել, որի արդյունքում, բժիշկների կողմից իրենց մասնագիտական պարտականությունները ոչ պատշաճ կատարելու հետևանքով, վիրահատությունից 3 օր անց՝ հուլիսի 1-ին, նա «Արմենիա» բժշկական կենտրոնում մահացել է: 28-ամյա Նարինեն 7 տարեկան երեխա ուներ։
Դեպքի առթիվ նշանակված փորձաքննության պատասխանների համաձայն՝ կնոջ բոլոր հետազոտությունները հիվանդանոց ընդունվելուց անմիջապես հետո պետք է կազմակերպվեին ոչ թե ինֆեկցիոն, այլ մանկաբարձական բաժանմունքում: Ըստ փորձագետների՝ հետագայում ձեռնարկված համարժեք բուժական միջոցառումները արդյունք չեն տվել եւ հնարավոր չի եղել փրկել կնոջ կյանքը, քանի որ ինֆեկցիոն բաժանմունք տեղափոխելու պատճառով տրվել է նրա վիճակի ոչ ճիշտ գնահատական, ախտորոշումը եղել է ուշացած:
