«Բարգավաճ Հայաստան» խմբակցության պատգամավոր Վարդան Օսկանյանի՝ մանդատը վայր դնելու մասին տեղեկությունները պաշտոնապես հերքվում են: ԱԺ ԲՀԿ խմբակցության քարտուղար Նաիրա Զոհրաբյանը NEWS.am-ի թղթակցի հետ զրույցում ասաց հետեւյալը. «Ես ինքս երեկ, դրա նախորդ օրն էլ հանդիպել եմ, զրուցել եմ պարոն Օսկանյանի հետ որպես շատ լավ բարեկամներ, պատգամավորական մանդատը դնելու մասին որեւէ ակնարկ պարոն Օսկանյանը, համենայն դեպս երեկվա մեր զրույցի ընթացքում, եւս չի արել, իսկ մենք զրուցել ենք տարբեր բաների մասին»:
Նշենք, որ «Հայկական ժամանակ» թերթը գրում է, որ նախօրեին ԲՀԿ խմբակցությունը նիստ է արել, որն անցել է լարված մթնոլորտում: Խմբակցության պատգամավորների մի մասը կտրականապես դեմ է արտահայտվել, որպեսզի կուսակցության նախագահը դառնա Նաիրա Զոհրաբյանը, մի մասն էլ պաշտպանել է Զոհրաբյանի թեկնածությունը: Լարված մթնոլորտը ԲՀԿ-ականների շրջանում դեռ պահպանվում է:
«Սպասվում է, որ առաջիկա մի քանի օրերի ընթացքում էլի մի քանի պատգամավորներ կհայտարարեն ԲՀԿ-ն լքելու մասին: Անգամ խոսակցություններ կան, որ Վահե Հովհաննիսյանը կարող է ընդհանրապես վայր դնել պատգամավորական մանդատը:
Մինչ այժմ տեղեկություններ կային միայն Վարդան Օսկանյանի մանդատը վայր դնելու մասին: Մեր տեղեկություններով՝ ԲՀԿ-ում երեկ Օսկանյանին փորձել են համոզել, որպեսզի նա չհրաժարվի մանդատից: Թե ինչով են ավարտվել այդ բանակցությունները՝ դեռ հայտնի չէ: Ակնհայտ է միայն, որ ԲՀԿ-ի քայքայումը դեռ շարունակվելու է»,-գրել էր թերթը:
