Պետք չէ կարծել, որ եթե նախկինում շրջանառության հարկը քիչ էր, ապա փոքր բիզնեսը քիչ էր վճարում։ Այս մասին մարտի 4-ին խորհրդարանում հայտարարել է Հայաստանի նախկին վարչապետ, Հայ ազգային կոնգրես խմբակցության պատգամավոր Հրանտ Բագրատյանը «Շրջանառության հարկի մասին» օրենքում փոփոխությունների նախագծի քննարկումներին։ Ըստ Բագրատյանի՝ ընդհանուր առմամբ, օրինագիծը ընդունելի է, եւ նա կողմ է քվեարկելու (ի տարբերություն ՀԱԿ խմբակցության ընդհանուր դիրքորոշման խմբ.)։
«Իհարկե 5 տոկոսն ավելի շատ է, քանի 3.5 տոկոսը։ Բայց փոքր եւ միջին բիզնեսը պետք է հասկանա. եթե նախկինում 3.5 տոկոս էր, ապա հարկային տեսուչները նրանցից 2 անգամ շատ էին գանձում։ Դրա համար էլ այժմ այդ վճարումները պարզապես տեղափոխվում են օրինական դաշտ»,- հայտարարել է Բագրատյանը։
Նրա կարծիքով՝ հարկի վճարման շեմը պետք է բարձրացնել տարեկան մինչեւ 125 մլն դրամ։ Ընդ որում, կարելի է բարձրացնել նաեւ հարկի դրույքաչափը։
«Շրջանառության հարկի մասին» օրենքում փոփոխությունների նախագծով առաջարկվում է առանց թղթաբանության գործելու դեպքում շրջանառության հարկը սահմանել 5 տոկոս: Եթե նախկինում առեւտրի սուբյեկտների համար շրջանառությունից հարկը կազմում էր 1%՝ գործարքների պարտադիր փաստաթղթավորմամբ, ապա հիմա դրույքաչափը 1,5% է՝ փաստաթղթավորված ապրանքների համար եւ 5%՝ «ստվերային»: Այդուհանդերձ, ընդհանուր շրջանառությունից հարկը չի կարող 1,5 տոկոսից ցածր լինել: Արտադրող սուբյեկտներից հարկը մնում է հինը՝ 3,5 տոկոս:
Շրջանառության հարկի համար առավելագույն շեմը առաջարկվում է տարեկան 58,35 մլն դրամից հասցնել 113,4 մլն դրամի: Այդ շեմն անցնելու դեպքում ԱԱՀ-ով հարկվում է միայն ավելացած մասը: