«Բարգավաճ Հայաստանը» կարող է հայտարարել ընդդիմություն դառնալու մասին: Այս մասին մարտի 4-ին խորհրդարանում լրագրողներին հայտարարեց ԲՀԿ խմբակցության պատգամավոր Միքայել Մելքումյանը՝ մեկնաբանելով մարտի 5-ի կուսակցության արտահերթ համագումարը:
Ամեն դեպքում, ըստ նրա, կուսակցությունը կտրուկ դեմ է ցնցումներին եւ մայդաններին: Դրանք երկիրը տասնյակ տարով հետ կտանեն, իսկ նման բան իր վրա վերցնելու իրավունք ոչ ոք չունի: «Հենց դրանով էր պայմանավորված կուսակցության նախագահ Գագիկ Ծառուկյանի որոշումը (փետրվարի 20-ի խոշոր ցույցը չեղյալ հայտարարելու մասին - խմբ.): Կարծում եմ՝ դա հասկանում է նաեւ մեր ժողովուրդը»,- հայտարարեց Մելքումյանը:
Հիշեցնենք, որ Մելքումյանը նաեւ հայտարարել էր, որ Ծառուկյանն արտահերթ համագումարի ժամանակ հրաժարվելու է կուսակցության ղեկավարի պաշտոնից: Մելքումյանի կարծիքով, կուսակցության նոր նախագահ է ընտրվելու ԲՀԿ խորհրդարանական խմբակցության քարտուղար Նաիրա Զոհրաբյանը:
Նշենք, որ 2012 թվականի խորհրդարանական ընտրություններից հետո կուսակցությունը հայտարարեց իշխող կոալիցիայից հեռանալու մասին եւ իրեն այլընտրանքային ուժ հռչակեց: Վերջին տարվա ընթացքում ԲՀԿ-ի գործողությունները (համենայն դեպս՝ հանրային) դե-ֆակտո ընդդիմադիր էին:
