![](img/news/25/54/60/default.jpg)
Հայ ներգաղթյալների համար շատ բարդ է լինելու մտնել Եվրասիական տնտեսական միության մրցունակ շուկա, եւ դժվար թե այս տեսակետից որեւէ լուրջ փոփոխություններ կատարվեն։ Այս մասին մարտի 4-ին մամուլի ասուլիսում հայտարարել է ժողովրդագիր Ռուբեն Եգանյանը՝ անդրադառնալով այն հարցին, թե ինչ ազդեցություն կարող է ունենալ երկրի միգրացիոն վիճակի վրա Հայաստանի անդամակցումը ԵՏՄ-ին։
Ժողովրդագրագետի խոսքով՝ դեռեւս չկան իրական գործոններ, որոնց շնորհիվ Հայաստանից արտագաղթող աշխատանքային միգրանտի վիճակը կբարելավվի։ «Ռուսաստանի դեպքում խոսում են ավելի բարվոք պայմանների մասին, սակայն հաշվի առնելով այդ երկրում տնտեսական իրավիճակը՝ կարծում եմ, որ մենք ոչ մի դրական ազդեցություն չեն ք զգա, եթե միայն բացասականը չզգանք»,- ընդգծել է Ռուբեն Եգանյանը։
Մամուլի ասուլիսի մեկ այլ մասնակցի՝ ազգագրագետ Աղասի Թադեւոսյանի խոսքով՝ Հայաստանի՝ ԵՏՄ-ին անդամակցելը առաջընթաց քայլ չէր։
«Մենք այսպես թե այնպես կապված էինք Ռուսաստանի հետ։ Այլ բան է, որ հիմա դա ֆորմալ բնույթ է ստանում։ Անկեղծ ասած՝ ես նույնպես լավատեսորեն չեմ տրամադրված. դժվար թե այս տարածաշրջանում տնտեսական վիճակի բարելավում նկատվի»,- եզրափակեց ազգագրագետը։