Իջեւանի ԲՀԿ-ական քաղաքապետ Վարդան Ղալումյանը մարտի 5-ից մեկնել է արձակուրդ: Այս մասին NEWS.am-ին հայտնեցին քաղաքապետարանից:
Նրանց խոսքով՝ Ղալումյանն արձակուրդից վերադառնալու է միայն մեկ ամիս անց: Թե ինչու է հենց ԲՀԿ 8-րդ արտահերթ համագումարի օրը Ղալումյանը մեկնել արձակուրդ, աշխատակիցները հայտնեցին, թե «արձակուրդ գնալու ժամանակն էր»:
Նրանք հայտնեցին նաեւ, որ դեռեւս տեղեկություն չկա՝ Իջեւանի քաղաքապետն էլ դուրս կգա կուսակությունից, թե ոչ:
Նշենք, որ երբ անցած տարվա աշնանը եռյակը հանրահավաք էր նախաձեռնել Իջեւանում, Վարդան Ղալումյանը ներկա չէր, մինչդեռ նրա մայրը՝ քաղաքի ավագ դպրոցի կազմակերպիչը, Իջեւանի Շատրվանների հրապարակ էր բերել դպրոցականների, ովքեր գոռում էին «այո, այո»:
Հիշեցնենք, որ մարտի 5-ին Գագիկ Ծառուկյանը հայտարարել է կուսակցության նախագահի պաշտոնից հրաժարվելու մասին: Այս հայտարարությունից հետո Գյումրիի, Աբովյանի, Նոր Հաճնի եւ Բյուրեղավանի քաղաքապետերը կուսակցությունից դուրս գալու դիմումներ են ներկայացրել:
