«Երեւանի ոսկերչական գործարան - 1 Գնոմոն»-ը Բեռլինում 2014 թվականի Գերմանիայի հավաքականի ֆուտբոլիստների պատկերով հուշամեդալների հավաքածու է ներկայացրել: Այս մասին NEWS.am-ի թղթակցին տեղեկացրեց գործարանի ներկայացուցիչ Աղասի Պողոսյանը:
Մեդալները ներկայացվել են Բեռլինում անցկացված աշխարհի խոշորագույն World Money Fair 2015 դրամական ցուցադրության ժամանակ: Ընդ որում, գործարանն այն ստեղծել է արտասովոր գաղափարի տեսքով՝ ընկերական շարժանկարի ժանրում: Այդ ոճում ֆուտբոլիստները պատկերված են մեդալի մի կողմում, իսկ հակառակ երեսին նրանց սովորական պատկերն է՝ չեմպիոնական գավաթով: Չեմպիոն ֆուտբոլիստներն արդեն տեղյակ են նոր հուշամեդալների մասին:
Ոսկերիչների ոըշադրության կենտրոնում է հայտնվել նաեւ Գերմանիայի կանցլեր Անգելա Մերկելը: Մեդալի մի կողմում հումորային շարժանկար է, մյուս կողմում՝ «Անգելա Մերկել. Գերմանիայի հավաքականի լավագույն ֆուտբոլային երկրպագու» գրություն: Հուշամեդալների դիզայնի հեղինակը քանդակագործ Հարություն Չալիկյանն է:
«Բեռլինցիները հումորի համար չնեղացան: Հակառակը, մոտենում էին հետաքրքրված, հեռանում՝ ժպիտով: Առավել եւս, որ հենց տեղում նրանց համար նման դիմանկարներ էին անում: Շարժանկարների հեղինակ նկարչին մենք հրավիրել էինք մեզ հետ»,- հավելեց Պողոսյանը:
Մեդալների որակը գնահատել են նաեւ մասնագետներ Ղազախստանից, Լիտվայից, Իտալիայից եւ այլ երկրներից: Քննարկումների ժամանակ գաղափար է ծնվել նույնքան արտասովոր կերպով հուշամեդալների վրա պատկերել Բուֆֆոնին, Պիրլոյին, դե Ռոսսիին եւ Իտալիայի հավաքականի մյուս անդամներին:
