Բուդապեշտում անցկացվող հունահռոմեական ըմբշամարտի աշխարհի առաջնությունում 84 կգ քաշային Արթուր Ալեքսանյանը տպավորիչ գոտեմարտերի արդյունքում նվաճեց ոսկե մեդալը: Ալեքսանյանը մեկնարկում 12:0 հաշվով հաղթեց ավստրիացի Քեւին Ֆրանկին, 8:2` շվեդ Յոհան Տոբիաս Կվարնմարկին: Ամենածանր պայքարը ստացվեց քառորդ եզրափակիչում: Ալեքսանյանը երեք մրցափուլում` 8:1, 0:1, 2:0 հաշվով առավելության հասավ ռուսաստանցի Մահմուդ Բաշիեւի նկատմամբ, կիսաեզրափակիչում էլ 3:0 հաշվով հաղթեց ուկրաինացի Ժան Բելենյուկին:
Եզրափակիչում Արթուր Ալեքսանյանի մրցակիցը հարավկորեացի Սե Յոլ Լին էր: Մեր ըմբիշն ուներ մեծ առավելություն, մրցակցին ոչ մի միավոր չզիջեց եւ հաղթեց 7:0 հաշվով:
