NEWS.am-ի Բլից-հարցազրույց Արցախի արտաքին քաղաքականության եւ անվտանգության հարցերով Հանրային խորհրդի նախագահ Մասիս Մայիլյանի հետ:
Ինչպե՞ս եք գնահատում Միջազգային դատարանի՝ Կոսովոյի հարցով երեկ կայացրած որոշումը, ըստ որի` Կոսովոյի միակողմանի անկախության հռչակումը համարվել է միջազգային օրենքներին չհակասող:
ՄԱԿ-ի միջազգային դատարանի որոշումը դրական եմ գնահատում, որը պետք է կարեւոր նախադեպային դեր խաղա Լեռնային Ղարաբաղի Հանրապետության միջազգային ճանաչման հարցում:
Ի՞նչ հետեւանքներ կարող է ունենալ այն միջազգային պրակտիկայում, մասնավորապես ԼՂՀ խնդրի կարգավորման հարցում:
2008 թվականին սկսվել է այն ինքնավարությունների ճանաչման գործընթացը, որոնք Խորհրդային Միության եւ Հարավսլավիայի փլուզման ժամանակ հռչակել են իրենց անկախությունը: Կոսովոն ստացավ միջազգային ճանաչում՝ Արեւմուտքի աջակցությամբ, իսկ նախկին ԽՍՀՄ կազմում ընդգրկված ինքնավարություններ Աբխազիան եւ Հարավային Օսիան ճանաչվեցին Ռուսաստանի եւ մի շարք այլ երկրների կողմից: Այսպիսով, ԱՄՆ-ը, Եվրամիությունը, Ռուսաստանը եւ մի շարք այլ երկրներ ճանաչումը համարում են հակամարտության գոտիներում կայունության ապահովման արդյունավետ մեխանիզմ:
Նման միջազգային պրակտիկան պետք է տարածել նաեւ Լեռնային Ղարաբաղի վրա: ԵԱՀԿ Մինսկի խմբի համանախագահները պետք է հրաժարվեն հնացած մեթոդոլոգիայից, որոնք նրանց կիրառում են ԼՂ խնդրի լուծման հարցում եւ ձեռնամուխ լինեն նոր առաջարկների մշակմանը` հաշվի առնելով միջազգային-իրավական ներկա իրողությունները:
Կա տեսակետ, որ Հաագայի դատարանի որոշումը առավելապես քաղաքական, այլ ոչ իրավական դրդապատճառներ ուներ։ Կարելի՞ է ասել, որ մյուս նմանատիպ հակամարտությունների դեպքում միջազգային հանրությունը կրկին նման դիրքորոշում կցուցաբերի:
Ավելի շուտ, ՄԱԿ-ի Միջազգային դատարանը իրավաբանորեն «արդարացրեց» այն երկրներին, որոնք ճանաչել են Կոսովոյի անկախությունը` քաղաքական դրդապատճառներից ու սեփական շահերից ելնելով: Չի կարելի ասել, որ այլ հակամարտությունների դեպքում անպայման կկիրառվի նույն մոտեցումը: Ակնհայտ է, որ 1975 թվականին ընդունված սկզբունքները վերանայման են ենթարկվում եւ Հայաստանի ու ԼՂՀ-ի դիվանագիտության, ինչպես նաեւ Սփյուռքի հայկական լոբբիստական կազմակերպությունների խնդիրն է, որպեսզի կարողանան հմտորեն օգտագործել Հաագայի դատարանի որոշումը՝ ԼՂՀ միջազգային ճանաչման համար:
