Հակառակորդի հատուկ նշանակության ուժեղացված խմբին դիմակայելու ժամանակ մարտի 19-ին ծանր վիրավորված եւ այսօր՝ մարտի 26-ին, մահացած ՊԲ զինծառայող, 19-ամյա Սամվել Հակոբյանը քիկբոքսինգի չեմպիոն էր: Հարեւանները NEWS.am-ին պատմեցին, որ Սամվելը բազմաթիվ մրցանակներ, մեդալներ ուներ:
«Ինքն էն երեխան էր, որ սիրված էր բոլորի կողմից: Մարզիկ էր, շատ ընտիր երեխա, հարգված: Մեր հարեւան գյուղերում անգամ սգում են նրա մահը: Բոլորը նրան ճանաչում էին, բոլորը սուգի մեջ են: Նա հայրենասեր տղա էր ու հայրենասեր ձեւով էլ ընկավ: Մի պահ եկել էր հոսպիտալում բուժվելու, առողջական խնդիրներ ուներ, դեռ չբուժված՝ էլի ուզում էր գնալ ծառայության, ասում էր՝ գնամ, ընկերներիս հասնեմ»,- ասաց հարեւաններից Ալբերտ Հովհաննիսյանը՝ նշելով, որ գյուղում մի դեպք պատահելիս Սամվելն առաջիններից էր, որ օգնության էր հասնում:
Սամվելը տան ավագ որդին էր, մեկ քույր ու եղբայր ունի: Եղբայրը նրա հետ էր ծառայում: Հարեւանները պատմեցին, որ Սամվելը հիվանդ մայր ունի, ընտանիքը հողագործությամբ է զբաղվում: Մինչեւ բանակ զորակոչվելը՝ Սամվելն աշխատել է ու օգնել ընտանիքին:
«17-18 տարեկան տղա էր, աշխատում էր, որ բերեր, ծնողներին պահեր: Մայրն էլ հիվանդ կին է, հազիվ է հասցնում, հիվանդ տատիկ ունի, էդ երկու երեխու վրա էր ընտանիքի հույսը»,- ասաց Ալբերտ Հովհաննիսյանը՝ հպարտությամբ հիշելով ծառայության ընթացքում Սամվելի գրած բանաստեղծությունը՝ ուղղված մորը. «Գրել էր՝ մամ ջան, չլացես, արտասուք չթափես,ես իմ հայրենիքի համար եմ ծառայում»:
Սամվելը մի քանի ամսից պետք է զորացրվեր, նա նպատակ ուներ իր ընտրած սպորտաձեւում ավելի հմտանալ:
Նշենք, որ Սամվել Հակոբյանը վիրավորվել էր գլխի շրջանում։ Նրա վիճակը ծայրահեղ ծանր էր եւ այս յոթ օրերի ընթացքում որեւէ փոփոխություն վիճակի մեջ չէր եղել. զինծառայողն անգիտակից վիճակում էր։
Հիշեցնենք, որ մարտի 19-ին՝ ժամը 08:30-ի սահմաններում, հակառակորդի հատուկ նշանակության ջոկատի ուժեղացված խումբը հարձակում է ձեռնարկել հյուսիսային (Գյուլիստանի) ուղղությամբ տեղակայված դիրքերի վրա: Շուրջ երկու ժամ տեւած մարտական գործողության արդյունքում դիրքապահ անձնակազմը եւ օգնության հասած ուժերը ստիպել են հակառակորդին մատնվել փախուստի, այնուհետեւ հետապնդելով վերջիններիս, ամբողջությամբ ոչնչացրել են խմբին` իրենց դիրքերի մատույցներում:
Ցավոք, հակառակորդին դիմագրավելու ժամանակ արիաբար զոհվել են ՊԲ զինծառայողներ Հակոբ Գագիկի Խաչատրյանը (1996թ.), Էդուարդ Գագիկի Հայրապետյանը (1995թ.) եւ Արշակ Կարենի Հարությունյանը (1995թ.), Պաշտպանության բանակի եւս 4 զինծառայողներ վիրավորվել են:
