Թուրքիայի՝ ԵՄ հարցերով նախարար Վոլքան Բոզքըրը հայտարարել է, թե Եվրախորհրդարանի կողմից Հայոց ցեղասպանության մասին ընդունվելիք որոշումը Թուրքիայի համար կլինի թղթի կտոր։
Թուրքական T24.com կայքի փոխանցմամբ՝ Իտալիայի մայրաքաղաքում երկրի վարչապետի հետ հանդիպումից հետո պատասխանել է լրագրողների հարցերին։ Թուրք նախարարը պատասխանել է նաեւ Եվրախորհրդարանում Հայոց ցեղասպանության հետ կապված քննարկումների հետ կապված հարցին։
«Մենք ճիշտ չենք համարում, որ պատմաբան չհանդիսացող մարդիկ խորհրդարաններում որոշակի քամիների ուղղորդմամբ որոշումներ են ընդունում։ Եվրախորհրդարանը ապրիլի 15-ին քննարկելու է 1915-ի իրադարձությունները»,-ասել է Վոլքան Բոզքըրը՝ շեշտելով, թե ընդունվելիք որոշումը եթե Թուրքիայի դեմ եղավ, ապա այն Թուրքիայի համար կլինի թղթի կտոր։