ԱՄՆ պետքարտուղար Ջոն Քերրին Իրանի միջուկային ծրագրի շուրջ Լոզանում անցկացվող բանակցությունների շրջանակում մարտի 28-ին կհանդիպի Ֆրանսիայի եւ Գերմանիայի ԱԳ նախարարների հետ: Այս մասին տեղեկացրել է Պետքարտուղարության պաշտոնական ներկայացուցիչը:
ՌԻԱ Նովոստին, վկայակոչելով AFP-ին, գրում է, որ Քերրին առանձին կհանդիպի Ֆրանսիայի ԱԳ նախարար Լորան Ֆաբիուսի հետ, այնուհետեւ եռակողմ հանդիպում կանցկացնի Ֆրանսիայի եւ Գերմանիայի արտաքին քաղաքական գերատեսչությունների ղեկավարների հետ: Ծրագրվում է նաեւ Ջոն Քերրիի հանդիպումն Իրանի ԱԳ նախարար Մոհամմադ Ջավադ Զարիֆի հետ:
Հիշեցնենք, որ շվեյցարական Լոզան քաղաքում մարտի 26-ին սկսվել է Իրանի եւ «վեցյակի» (Ռուսաստան, ԱՄՆ, Չինաստան, Մեծ Բրիտանիա, Ֆրանսիա եւ Գերմանիա) բանակցությունների հերթական փուլը:
Կողմերը դիվանագիտական ջանքեր են գործադրում՝ մինչեւ մարտի վերջը համաձայնագրի քաղաքական մասը մշակելու, եւ մինչեւ հունիսի վերջը համապարփակ համաձայնության հասնելու համար:
