Մենք Հունգարիայի Գիտությունների ազգային ակադեմիայի հետ շարունակում ենք գիտական ծրագրեր իրականացնել, իսկ մնացած հարցերը պետք է լուծվեն դիվանագիտական մակարդակով։ Այս մասին ապրիլի 3-ին ՀՀ ԳԱԱ ամենամյա ժողովի ժամանակ հայտարարեց Գիտությունների ազգային ակադեմիայի նախագահ Ռադիկ Մարտիրոսյանը՝ պատասխանելով հարցին, թե Հայաստանի եւ Հունգարիայի գիտությունների ազգային ակադեմիաների միջեւ հարաբերությունները շարունակում են խզված մնալ, թե ոչ։ Հիշեցնենք, որ այդ հարաբերությունները խզվել էին Հունգարիայի կողմից հայ սպային սպանած Ռամիլ Սաֆարովին Ադրբեջան արտահանձնելու պատճառով։
Նախագահը նշեց, որ թեեւ Հայաստանը այն ժամանակ որոշեց խզել հարաբերությունները Հունգարիայի Գիտությունների ազգային ակադեմիայի հետ, հետագայում պարզ դարձավ, որ դա անիմաստ է, հատկապես, որ պետական եւ գիտական շրջանակներում այդ քայլը քննադատեցին։ «Մնացած հարցերը քննարկվում են պետական եւ դիվանագիտական մակարդակով»,- նշեց նա։
Հիշեցնենք, որ Թուրքիայում հատուկ պատրաստվածություն անցած Ադրբեջանի ԶՈւ սպա Ռամիլ Սաֆարովը 2004թ. փետրվարին մասնակցում էր ՆԱՏՕ-ի «Գործընկերություն հանուն խաղաղություն» ծրագրի շրջանակում անգլերենի դասընթացներին, որոնց մասնակցում էին նաեւ հայ սպաներ Գուրգեն Մարգարյանն ու Հայկ Մակուչյանը: Փետրվարի 19-ի գիշերը Սաֆարովը թաքուն մտել էր Գուրգեն Մարգարյանի սենյակը եւ կացնահարել քնած հայ սպային: Դրանից հետո Սաֆարովը փորձել էր սպանել Մակուչյանին, բայց վերջինիս սենյակի դուռը բարեբախտաբար փակ էր եղել: 2006թ. ապրիլին Սաֆարովը Բուդապեշտի դատարանի կողմից ցմահ ազատազրկման էր դատապարտվել` 30 տարի առանց ներման իրավունքի: 2012թ. օգոստոսի 31-ին Սաֆարովին արտահանձնեցին Ադրբեջանին, որտեղ մարդասպանին նախագահի կողմից ներում շնորհվեց, զինվորական բարձր կոչում տրվեց եւ միանվագ վճարվեց 8 տարվա աշխատավարձը: Արտահանձման օրը Հայաստանը խզեց իր դիվանագիտական հարաբերությունները Հունգարիայի հետ։
ՀՀ ԳԱԱ-ն նույնպես հայտարարություն տարածեց այն մասին, որ դադարում է համագործակցել Հունգարիայի Գիտությունների ազգային ակադեմիայի հետ։