ՀՀ վարչապետ Տիգրան Սարգսյանն այսօր` հուլիսի 26-ին հանդիպելով եգիպտական «ԱՐՏՈԿ գրուպ» ներդրումային ընկերության պատվիրակությանը, կարեւորել է այդ ընկերության հետ հարաբերությունների ընդլայնումը եւ ներդրումների շրջանակի հստակեցումը։
Ինչպես NEWS.am-ը տեղեկանում է Կառավարության մամուլի ծառայությունից, պատվիրակության անդամ, «Քուշման եւ Ուեյքֆիլդ» ընկերության խորհրդի նախագահ Ջոն Քուշմանը, ով ԱՄՆ անշարժ գույքի զարգացման ոլորտում մեծ հեղինակություն է վայելում, ներկայացրել է իր պատկերացումները Հայաստանում ներդրումներ կատարելու հնարավորությունների վերաբերյալ։
Հանդիպման ընթացքում կողմերը զրուցել են Հայաստանում հնարավոր ներդրումային ծրագրերի իրականացման հեռանկարների շուրջ։ Մասնավորապես, քննարկվել են Երեւանի մոտակայքում «Խելացի գյուղ» ծրագրի իրականացման մանրամասներ։ Այս համատեքստում ընդգծվել է «ԱՐՏՈԿ գրուպ» ընկերության եւ ՀՀ կառավարության միջեւ համագործակցության շարունակականության կարեւորությունը։
