Հայաստանը միջազգային ներդրողների համար գրավիչ լինելու լավ շանս ունի։ Այս մասին մարտի 5-ին ներդրումային-ֆինանսական համաժողովի ժամանակ ասել է «Freedom Holding Corp.» միջազգային հոլդինգի հիմնադիր եւ ղեկավար Թիմուր Տուրլովը։
Նա նշել է, որ Հայաստանից ազդանշան է ստացվում եվրոպական ինտեգրման ցանկության, գործընթացները կատարելագործելու ձգտման, միջազգային ինստիտուտների հետ ակտիվ փոխգործակցելու մասին։
Տուրլովը նշել է, որ ներդրողներին ավելի շատ գրավում է իր ինստիտուտները զարգացնելու երկրի ձգտումը, երբ երկիրը կենտրոնանում է իր վրա, ավելի, քան արտաքին քաղաքական նախագծերի կամ հարեւանների հետ բարդ հարաբերություններ հաստատելու վրա։ «Ներդրողներին դուր է գալիս, երբ երկիրը կենտրոնանում է ներքին հարցերի լուծման վրա, նրանց վախեցնում է ավելի շատ արտաքին խնդիրներով զբաղվելու ձգտումը։ Դա շատ լավ երեւում է Ռուսաստանի օրինակով, որին հաջողվել է վախեցնել բոլոր ներդրողներին»,- ընդգծել է նա։
Նրա գնահատմամբ՝ Հայաստանում գրավիչ են պետական պարտքի տոկոսադրույքը եւ հարկային ռեժիմը։ Ընկերության ղեկավարը նշել է ֆինանսական համակարգի հանդեպ վստահության կարեւորությունը, այդ թվում ազգային անվտանգության համար։
«Որքան ավելի շատ լինեն հանրային ընկերությունները, այնքան ավելի լավ կհավաքվեն հարկերը, որքան ավելի շատ լինեն մասնավոր ներդրողները, այնքան ավելի ակտիվ կլինի տնտեսությունը։ Եթե մենք ցանկանում ենք Հայաստանում տեսնել արժեթղթերի հարյուր հազար ռեզիդենտ-գնորդներ, ապա պետք է ստեղծվեն պայմաններ, պետք է հայտնվեն լիարժեք ներդրումային բանկեր, որոնք կկարողանան կատարել համապատասխան գործառնություններ»,- ամփոփել է նա։