2014թ. աշնանը ֆինանսական միջոցներ ներգրավվելու համար չվերթները մի քանի ամսով դադարեցրած Air Armenia ավիաընկերությունը դեռեւս չի փոխհատուցել ավիատոմսեր գնած բոլոր քաղաքացիներին:
NEWS.am-ի թղթակցի հետ զրույցում անցած տարվա նոյեմբերին Կրասնոդար-Երեւան չվերթի համար ավիատոմս գնած մի քաղաքացի հայտնեց, որ խոստացել էին փոխհատուցել, սակայն առ այսօր գումարը չի ստացել:
«Տոմսը գնեցի եւ մեկ շաբաթ էր մնացել՝ մինչեւ թռիչքս, երբ իմացանք, որ չվերթները դադարեցրել է ավիաընկերությունը: Այդ ժամանակ ասում էին, որ կփոխհատուցեն, սակայն դեռ չեն տվել»,- ասաց նա:
Air Armenia ավիաընկերության մամուլի ծառայությունից NEWS.am-ին հայտնեցին, որ փոխհատուցումներն իսկապես դադարեցվել են որոշակի ժամկետով, որովհետեւ գտնվում են դատական գործընթացի մեջ եւ բանկային հաշիվները կալանքի տակ են:
«Հենց հնարավորություն լինի, բոլոր փոխհատուցումները կավարտենք: Մաքսիմում մեկ ամսվա խնդիր է: Բայց նշենք, որ փոխհատուցումների մեծ մասն ավարտված է, շատ փոքր մասն է մնացել»,- հայտնեցին ավիաընկերությունից:
Նշենք, որ դեռ 2014թ. դեկտեմբերին լրագրողների հետ զրույցում Air Armenia ավիաընկերության գլխավոր տնօրեն Արսեն Ավետիսյանը հայտնել էր, որ տոմսերի դիմաց փոխհատուցել են մոտ 2800 ուղեւորի, մնացել է ընդամենը 375 ուղեւոր:
Հիշեցնենք, որ 2014թ. ամառվանից մամուլում տեղեկություններ էին տարածվել, որ միակ հայկական ուղեւորափոխադրող Air Armenia ավիաընկերությունը սնանկացման եզրին է: Թեեւ ավիաընկերությունը համառորեն հերքում էր տարածված լուրերը, աշնանն մի քանի չվերթ հետաձգեց՝ պատճառաբանելով, որ ֆինանսան ներդրողներ են փնտրում: Դեկտեմբերին արդեն միակ հայկական ուղեւորափոխադրողը հայտարարեց, որ ուկրաինական «East Prospect Fund» ներդրումային հիմնադրամը 30 մլն դոլար կներդնի ավիաընկերության 49% բաժնեմասում:
