1915 թվականին Օսմանյան կայսրությունում քրիստոնյա բնակչության՝ հայերի, ասորիների, սիրիացիների, պոնտացի հույների դեմ իրականացված սարսափելի ցեղասպանությունը, որը սովորաբար սեյֆո ենք կոչում, Ցեղասպանություն է: Դա գիտեր նաեւ Ադոլֆ Հիտլերը: Սակայն Շվեդիայի ԱԳ նախարար Մարգոթ Վալստրեմը մինչեւ հիմա հերքում է դա: Այս մասին ասված է Շվեդիայի խորհրդարանի պատգամավոր, ծագումով ասորի Ռոբերտ Հաննի հարցման մեջ: Շվեդական խորհրդարանի կայքի փոխանցմամբ, այն հրապարակվելու է 2015 թվականի ապրիլի 30-ին:
Պատգամավորի նախորդ գրավոր հարցմանն այն մասին, թե ինչ է նախարարը մտածում Ցեղասպանության 100-րդ տարելիցի առիթով, շվեդ պաշտոնյան պատասխանում կրկին կիրառել է «այդ իրադարձությունները» եւ «ողբերգական իրադարձությունները» եզրույթը, չնայած 2014 թվականի խորհրդարանական ընտրություններում հաղթանակած սոցիալ-դեմոկրատների կուսակցության ղեկավար Ստեֆան Լյովենը խոստացել էր ճանաչել Ցեղասպանությունը:
«Ինչո՞ւ է պետնախարարը խախտում Ցեղասպանության ճանաչման մասին 2014 թվականի մարտին տրված խոստումը: Ի՞նչ աղբյուրներից է օգտվում նախարարն այդ հարցի ուսումնասիրման ժամանակ: Ե՞րբ է նա պատրաստվում ճանաչել ընդունված ուսումնասիրությունների արդյունքները»,- ասված է պատգամավորի հարցման մեջ: