Վարդան Պետրոսյանի մասնակցությամբ ողբերգական ավտովթարից տուժած կողմի` Հակոբյանների ներկայացուցիչը մոտ օրերս նոր քաղաքացիական հայց կներկայացնի դերասանի դեմ:
«Վարդան Պետրոսյանը փաստաբանների ծախսերի համար 2 միլիոն 380 հազար դրամ պետք է վճարի, որը մինչեւ հիմա չի վճարվել: Այդ պատճառով քաղհայցով ենք պահանջելու այդ գումարը»,- NEWS.am-ի հետ զրույցում ասաց տուժող կողմի ներկայացուցիչ Ռուբեն Բալոյանը:
Փաստաբանը նշեց, որ Վարդան Պետրոսյանն ու իր փաստաբանը վիճարկում են գումարի չափը. պնդում են, որ դա չափազանց մեծ է երկու փաստաբանի համար:
«Կարծում եմ, որ 6 հոգու շահերը ներկայացնող 2 փաստաբանի համար այդ գումարը մեծ չէ»,-ասաց Ռուբեն Բալոյանը:
Հիշեցնենք, որ 2013 թվականի հոկտեմբերի 20-ին, ժամը 21:20-ին, Եղվարդ-Երեւան մայրուղու 32-րդ կմ-ում երկու ավտոմեքենա իրար են բախվել: Պատահարի հետեւանքով 7 մարդ մարմնական վնասվածքներով տեղափոխվել է հիվանդանոց, այդ թվում՝ դերասան Վարդան Պետրոսյանը: Էդգար եւ Էդուարդ Հակոբյան եղբայրները մահացել են: Փաստի առիթով հարուցվել էր քրեական գործ՝ ՀՀ Քրեական օրենսգրքի 242 հոդվածի 3-րդ մասով: Վարդան Պետրոսյանը ձերբակալվել էր: Դատաքննությունը սկսվեց 2014 թվականի մարտի 12-ին: Հայաստանի Կոտայքի մարզի ընդհանուր իրավասության դատարանը 2015թ. հունվարի 29-ին մեղավոր ճանաչեց Վարդան Պետրոսյանին՝ նրան դատապարտելով 5 տարի ժամկետով ազատազրկման:
Դատախազը եւ տուժող կողմը բողոքարկել են առաջին ատյանի որոշումը: