![](img/news/26/33/33/default.jpg)
Վերաքննիչ քրեական դատարանն այսօր՝ ապրիլի 22-ին, մերժել է Հիմնադիր խորհրդարանի փոխնախագահ Վարուժան Ավետիսյանի երկամսյա կալանքը փոխելու վերաբերյալ ներկայացված բողոքը։
Հիշեցնենք, որ մինչ այդ Վերաքննիչ քրեական դատարանը մերժել էր նաեւ Ժիրայր Սեֆիլյանի, Պավել Մանուկյանի, Գեւորգ Սաֆարյանի, Արամ Հակոբյանի, Գարեգին Չուգասզյանի գործերով բողոքները:
Ավելի վաղ NEWS.am-ը հայտնել էր, որ «100-ամյակն առանց ռեժիմի» շարժումն ապրիլի 7-ին հայտարարել է, որ առավոտյան ժամը ժամը 6:35-ի սահմաններում Հիմնադիր խորհրդարանի շենք են ներկայացել իրավապահ մարմինների շուրջ երկու տասնյակ աշխատակիցներ եւ խուզարկություն են իրականացնում: Խուզարկություններ են անցկացվել նաեւ ՀԽ անդամների տներում, որից հետո բերման են ենթարկվել Ժիրայր Սեֆիլյանը, Վարուժան Ավետիսյանը, Պավել Մանուկյանը, Հայկական վերածնունդի Լիբանանյան ներկայացուցիչ Թորոս Սեֆիլյանը (Ժիրայր Սեֆիլյանի եղբայր), Հովհաննես Ղազարյանը, Արամ Հակոբյանը, Գեւորգ Սաֆարյանը, Գարեգին Չուքասզյանը: Ապրիլի 9-ին նրանցից 5-ին կալանավորվել են: Իսկ Արամ Հակոբյանի դեպքում կալանքի փոխարեն ընտրվել է խափանման միջոց գրավը:
Իր հերթին ՀՀ Քննչական կոմիտեն հաղորդագրություն է տարածել, որում ասվում է, որ ՀՀ ազգային անվտանգության ծառայության եւ ՀՀ քննչական կոմիետի համատեղ ձեռնարկած միջոցառումների արդյունքում կանխվել է 2015թ. ապրիլի 24-ին հրապարակային միջոցառումների անցկացման վայրերում զանգվածային անկարգությունների կազմակերպումը: