Գորիսում մայիսի 2-ին տեղի ունեցած միջադեպի հետեւանքով վնասվածքներ ստացած քաղաքացին հիվանդանոցում այլ կերպ է ներկայացրել տեղի ունեցածը: «Գորիսի» հիվանդանոցի փոխտնօրեն Լեւոն Հարությունյանը NEWS.am-ի թղթակցի հետ զրույցում ասաց, որ մայիսի 2-ին իրենց մոտ ընդունվել է 32-ամյա Հ. Զ.-ն՝ աչքի վնասվածքով, կոպի պատռվածքով: Վերջինս բժիշկներին հայտնել է, թե Գորիս-Երեւան ճանապարհին մեքենայի վրա աշխատելիս է եղել, քար է թռել, աչքի վնասվածք է ստացել: Երիտասարդին ամբուլատոր բուժօգնություն են ցուցաբերել եւ նա գնացել է:
Ավելի վաղ հայտնել էինք, որ Սյունիքի մարզպետի որդու մասնակցությամբ հերթական ծեծկռտուքն է տեղի ունեցել Գորիսում: NЕWS.am-ի տեղեկություններով՝ մայիսի 2-ին, երեկոյան, Սյունիքի մարզպետի որդին՝ Տիգրան Խաչատրյանը, մեքենա վարելիս զուգահեռ անցնող ավտոմեքենան երթեւեկությունը խախտել է, վեճ է առաջացել, ապա պայմանավորվել են հանդիպել Սդղի գյոլ կոչվող հատվածում: Երեկոյան երկու եղբայրները, ովքեր Ավետիք Բուդաղյանի հետ բարեկամական կապեր ունեն եւ որոշակի խնդիրներ են ունեցել Սյունիքի մարզպետի հետ, գնացել են նշված տարածք: 2 եղբայրներին դիմավորել են 40-ից ավելի երիտասարդներ, վիճել են, հայհոյել եւ հավաքվածները ծեծի են ենթարկել: Նրանցից մեկի վիճակը ծանր է եղել, տեղափոխվել է Երեւան: Մեր աղբյուրների փոխանցմամբ՝ երիտասարդի աչքն է վնասված եւ առայժմ հայտնի չէ, թե վիրահատությունից հետո տեսողությունը կվերականգնվի, թե՝ ոչ:
Ոստիկանության լրատվական ծառայությունից NEWS,am-ին հայտնեցին, որ «Գորիսի» հիվանդանոցից հաղորդում է ստացվել, որ իրենց մոտ է տեղափոխվել աջ աչքի վնասվածքով, կոպի պատռվածքով մի քաղաքացի: Պարզվել է, որ վնասվածքը ստացել է մայիսի 2-ին Սդղի գյոլ տարածքում վիճաբանության ժամանակ, կատարվում է հետաքննություն, հանգամանքները պարզվում են:
