Enerco Enerji, Bosphorus Gas, Avrasya Gaz, Shell, Bati Hatti, Akfel Gas եւ Kibar Enerji թուրքական մասնավոր գազ ներկրող ընկերությունները «Գազպրոմի» հետ մի քանի ամիս տեւած բանակցություններից հետո զեղչ են ստացել ռուսական ընկերությունից, գրում է «Կոմերսանտ»-ը։

Ներկայումս առաջին եռամսյակում գազի գինը 1000 խ/մ-ի դիմաց կկազմի 300  դոլարից պակաս։ Երկրորդ եռամսյակում՝ 260 դոլար, ասել է պարբերականի զրուցակիցը։ Նախքան այդ թուրքական մասնավոր ընկերությունները 1000 խ/մ  ռուսական գազի դիմաց վճարում էին 374 դոլար, ինչը  Եվրոպայում ընթացիկ շուկայական մակարդակից բարձր է։

Կողմերը նաեւ պայմանավորվել են գնագոյացման մեջ փոփոխություններ կատարել նաեւ պայմանագրում. ֆիքսված գնի փոխարեն կգործի նավթային ինդեքսավորումը։

Նոր համաձայնագիրը ուժի մեջ կմտնի հետին թվով՝ 2015թ. հունվարի 1-ից, ինչը  նշանակում է՝ «Գազպրոմը» ներկրողին պետք է հետ վերադարձնի գումարի մի մասը, որը, պարբերականի գնահատմամբ՝ կազմում է 250-300 մլն դոլար։

«Կոմերսանտ»-ի տվյալներով՝ ռուսական եւ թուրքական պետական ընկերությունների բանակցությունները փակուղի են մտել։ Նրանք 3 ամսվա ընթացքում համաձայնեցրել են զեղչը, սակայն այդպես էլ չեն պայմանավորվել, թե  պայմանագրային բանաձեւի որ բաղադրիչին այն պետք է վերաբերի։