Համաձայն պաշտոնական տվյալների՝ հունվար-մարտին գրանցված հանցագործությունների թիվը տարեկան հաշվարկով 665 դեպքով պակասել է (13.8 տոկոսով)։ Ընդ որում գրեթե 1/3-ով պակասել է միջին ծանրության հանցագործությունների քանակը (31.4 տոկոսով)։

Գրանցված հանցագործությունների համակարգում ավանդաբար գերիշխում է «սեփականության դեմ գործած հանցագործությունները»։ Դրանց բաժինը եռամսյակային ընդհանուր հաշվարկով կազմել է 44 տոկոս։ Գողանում են ինչպես պետական, այնպես էլ մասնավոր ունեցվածքը, սակայն՝ տարբեր հարաբերություններով։

Պետական ունեցվածքի սեփականաշնորհումից հետո գողանալու բան այլեւս չկա, այդ պատճառով հանցագործներն ավելի շատ աչք են դնում քաղաքացիների մասնավոր ունեցվածքի վրա։

Մասնավոր ունեցվածքի կողոպուտը առաջին եռամսյակում գրանցված հանցագործությունների ընդհանուր քանակում կազմել է մոտ 40 տոկոս, իսկ պետական ունեցվածքի կողոպուտը՝ 1 տոկոս։ Գրեթե 1.6 անգամ պակասել է բնակարանային գողությունների թիվը։ Եթե 2014թ. հունվար-մարտին թալանվել է 475 բնակարան, ապա այս տարվա նույն ժամանակահատվածում՝ 303 բնակարան։ Այսինքն՝ միջինում օրական 3.4 բնակարան։