ԵԱՀԿ-ի լրատվամիջոցների հարցերով լիազոր ներկայացուցիչ Դունյա Միյատովիչը զեկույց է պատրաստել խոսքի ազատության մասին, որտեղ խիստ քննադատության է ենթարկում Ադրբեջանին:
«Մարտի 25-ին ես դիմել եմ Ադրբեջանի ԱԳ նախարար Էլմար Մամեդյարովին, որպեսզի ողջունեմ նախագահ Իլհամ Ալիեւի կողմից «Ազադլիգ» թերթի գլխավոր խմբագիր Գանիմաթ Զահիդին ներելու որոշումը: Զահիդը բանտարկվել է կասկածելի քրեական մեղադրանքով եւ անազատության մեջ է անցկացրել 4 տարի (իր պատժի կեսը)»,- ասված է զեկույցում: Այնուհետեւ Միյատովիչը շարունակում է.
«Իմ բոլոր հետագա միջոցառումներում ուշադրությունը կենտրոնացված է եղել դեռեւս բանտարկության մեջ գտնվող լրագրողների եւ բլոգերների վրա: Ապրիլի 22-ին ես հրապարակայնորեն կոչ եմ արել Ադրբեջանի իշխանություններին կատարել Մարդու իրավունքների Եվրոպական դատարանի որոշումը, ըստ որի՝ լրագրող Էյնուլա Ֆաթուլաեւը 2007-ին անօրինականորեն դատապարտվել է 8,5 տարվա ազատազրկման եւ պետք է անհապաղ ազատ արձակվի:
Հունիսի 15-ին ես դիմել եմ նախագահ Ալիեւին՝ խնդրելով հասնել Ֆաթուլաեւի եւ երկու բլոգերների` Էմին Աբդուլաեւի եւ Ադնան Հաջիզադեի ազատմանը, որոնք դատապարտվել են համապատասխանաբար, 2 եւ 2,5 տարվա ազատազրկման` խուլիգանության եւ թեթեւ մարմնական վնասվածքներ հասցնելու մեղադրանքով: Վերաքննիչ դատարանը երկու հայցերն էլ բավարարել է»,- ասել է նա:
ԵԱՀԿ ներկայացուցիչը նշել է, որ հուլիսի 6-ին Բաքվի մարզային դատարանը Ֆաթուլաեւին դատապարտել է 2,5 տարի լրացուցիչ ժամկետով` թմրանյութեր պահելու կասկածելի մեղադրանքով:
Նույն օրը, ես հրապարակայնորեն դատապարտել եմ այդ վճիռը, որը, իմ կարծիքով, ցույց է տալիս, որ Ադրբեջանը չի ցանկանում կատարել լրատվամիջոցների ազատության վերաբերյալ ԵԱՀԿ-ի առջեւ ստանձնած իր պարտավորությունները: Մեր վարչությունը շարունակելու է ուշադիր հետեւել Ֆաթուլաեւի գործին եւ պնդել, որպեսզի լրագրողը, ինչպես նաեւ 2 բլոգերները ազատ արձակվեն»,- ընդգծել է Դունյա Միյատովիչը: