Հիմնադիր Խորհրդարանի հետ գործակցելու պատճառով Հայաստանի քաղաքագետների միության նկատմամբ հալածանքի նոր ալիք է սկսվել։
Հիմնադիր խորհրդարանի քարտուղարության հայտարարության մեջ ասվում է. «Հիմնադիր խորհրդարանի նախաձեռնությամբ 2015 թ. մայիսի 18-ին կազմակերպված «Քաղաքական հետապնդումները եւ ստալինիզմի ուրվականը Հայաստանում» թեմայով կլոր սեղան-քննարկման հաջորդ օրը ռեժիմը հալածանքի նոր ալիք է սկսել քննարկման մասնակից, Հայաստանի քաղաքագետների միության նախագահ Հմայակ Հովհաննիսյանի եւ նրա գլխավորած միության դեմ:
Նույն շենքում տարածք ունեցող եւ ռեժիմի հենասյուններից մեկը համարվող հայտնի օլիգարխի ազգականի կարգադրությամբ ցուցադրաբար պոկել եւ միջանցք են շպրտել Քաղաքագետների միության ցուցանակը, ինչպես նաեւ այդ անձի հսկողության ներքո գտնվող կապի վահանակից անջատել են միության քաղաքային հեռախոսահամարները:
Ս. Սարգսյանի կողմից ԵՏՄ-ին անդամակցելու քաղաքական որոշման օրվանից՝ չարաբաստիկ սեպտեմբերի 3-ից, հետո ռեժիմի թիրախում հայտնված Քաղաքագետների միության եւ նրա ղեկավարի նկատմամբ հալածանքի նոր ալիք սկսելու վերաբերյալ հրահանգը բացատրվում է այն հանգամանքով, որ նրա ղեկավար Հմայակ Հովհաննիսյանը ոչ միայն ակտիվ կերպով մասնակցել է վերը նշված քննարկմանը, այլեւ դրա արդյունքների հաշվառմամբ հրապարակվելիք հայտարարության խմբագրմանը, ինչի նպատակով այցելել է Հիմնադիր խորհրդարանի գրասենյակ:
Ռեժիմը 25-ամյա գործունեություն իրականացնող Քաղաքագետների միության նկատմամբ որպես հալածանք իրականացնելու լծակ է օգտագործում այդ կազմակերպությանը նրա ներկայիս գործունեության վայրից հեռացնելու սպառնալիքը, ինչը բացահայտ անօրինականություն է, քանի որ նրա զբաղեցրած տարածքը սեփականության իրավունքով պատկանում է Հմայակ Հովհաննիսյանին: Հատկանշական է, որ Քաղաքագետների միության քաղաքային հեռախոսակապը վերականգվել է միայն Մարդու իրավունքների պաշտպանի գրասենյակի արագ արձագանքման խմբի միջամտությունից հետո, իսկ ոստիկանությունը մինչ այս օր դեպքի վայր չի ժամանել:
Կատարվածը եւս մեկ անգամ վկայում է այն մասին, որ Հայաստանում հաստատվել է ստալինյան ամբողջատիրության մեթոդներով իրականացվող բռնատիրություն, ինչի դեմ հարկավոր է համազգային ճակատ կազմել»:
