Երեւան քաղաքից հանված 25 շարժական գազալցակայանները պատկանում էին «ոչ թուլիկ» մարդկանց: Այս մասին այսօր՝ մայիսի 28-ին, մի քանի լրագրողների հետ զրույցում ասաց ՏԿԱԻ նախարար Արմեն Երիցյանը՝ պատասխանելով հարցին, թե արդյոք նախարարությունը կկարողանա ստուգումներ անցնել Հովիկ Աբրահամյանի եւ Գագիկ Ծառուկյանի ընտանիքներին պատկանող գազալցակայաններում:
«Ես չգիտեմ, թե որ գազալցակայանը ում է պատկանում, բայց այն շարժական գազալցակայանները, որոնք մենք քաղաքից հանեցինք, դրանց հետևում էլ թուլիկ մարդիկ չէին կանգնած, գործող օրենքը բոլորիս համար է»,- ասաց նախարարը:
Արմեն Երիցյանի խոսքով՝ արդեն երկուշաբթի ստուգումներ են անցկացվելու հանրապետությունում գործող գազալցակայաններում:
«Իհարկե, մինչեւ այս էլ ստուգումներ եղել են, խախտումներն արձանագրվել են, տարբեր մարդիկ տուգանքների են ենթարկվել: Կարծում եմ, որ մենք պետք է շարունակենք ստուգումները, եւ մարդիկ պետք է հասկանան, որ ավելի լավ է մի քիչ գումար ծախսել, որպեսզի նման դեպքեր չլինեն»,- նշեց նախարարը՝ անդրադառնալով մայիսի 26-ին նախկին պատգամավոր Հակոբ Հակոբյանին պատկանող գազալցակայանում տեղի ունեցած պայթյունից:
Նշենք, որ վերջին շրջանում գազալցակայաններում պայթյուններն ավելի հաճախակի են դարձել: