Էլեկտրաէներգիայի թանկացումն աննպատակ չէ, եւ եթե թանկացում լինի, ապա դա պետք է միտված լինի ավելի բարվոք էլեկտրաէներգիա ստանալու գործին: Այս մասին այսօր՝ մայիսի 28-ին, լրագրողների հետ զրույցում ասաց Արագածոտնի մարզպետ Սարգիս Սահակյանը:
«Եթե կարիք կա թանկացման, ուրեմն պետք է թանկանա, ասում եմ՝ դա ինքնանպատակ չի կարող լինել։Եթե թանկացում պետք է գնա, պետք է միտվի մի բանի, որպեսզի մենք ավելի հարմար, ավելի բարվոք էլեկտրաէներգիա ստանանք։ Դե հիմա մենք բոլորս գիտակցում ենք, եթե մի բան կատարվում է մեր երկրում, օրինակ՝ համայքների խոշորացում, ուրեմն դրա կարիքը կա, անհրաժեշտություն կա ավելի համախմբված կառավարում անցկացնելու, ավելի հզոր համայնքներ ունենալու, նույնն էլ էլեկտրաէներգիայի դեպքում է»,– ասաց մարզպետը։
Մարզպետը նշեց, որ Արագածոտնի մարզում մեծ թվով հենասյուներ եւ հոսանքալարեր անմխիթար վիճակում են, որոնք, ըստ նրա, հնարավոր կլինի վերանորոգել էլեկտրաէներգիայի սակագնի բարձրացման շնորհիվ:
Նշենք, որ երեկ՝ մայիսի 27-ին, Ազատության հրապարակում տեղի ունեցավ Էլեկտրաէներգիայի թանկացման դեմ «Ոչ թալանին» նախաձեռնության կազմակերպած հավաքը, որից հետո մասնակիցները երթով անցան Սայաթ-Նովա, Աբովյան, Ամիրյան փողոցներով, Մաշտոցի պողոտայով, ապա երթն ավարտեցին Ազատության հրապարակում: էլեկտրաէներգիայի թանկացման դեմ բողոքի ակցիաներ են անցկացվել նաեւ Հայաստանի մարզերում: Էլեկտրաէներգիայի թանկացման դեմ բողոքի ակցիաները շարունակական են լինելու:
Հիշեցնենք, որ ՀԷՑ-ը դիմել է Հանրային ծառայությունների կարգավորող հանձնաժողովին՝ հոսանքի սակագինը բարձրացնելու համար։ Ներկայումս սակագինը կազմում է 1 կՎտ-ի համար 41,85 դրամ ցերեկը, եւ 31,85 դրամ՝ գիշերը։ ՀԷՑ-ն առաջարկում է թանկացնել մինչեւ 58 եւ 48 դրամ համապատասխանաբար:
