Հայաստանում վաղուց անհրաժեշտություն կար նոր քաղաքական ուժ ձեւավորելու: Այս մասին այսօր՝ մայիսի 30-ին, NEWS.am-ի հետ զրույցում ասաց նորաստեղծ «Քաղաքացիական պայմանագիր» կուսակցության խորհրդի անդամ, ազատամարտիկ Սասուն Միքայելյանը՝ ավելացնելով, որ իրենց կուսակցությունն ի զորու է իշխանափոխություն անել Հայաստանում:
«Դեռեւս իշխանության մեջ լինելու ժամանակ հասկացա, որ պետք է նոր ուժ ձեւավորել, որովհետեւ պատկերացնում էի, որ կգա ժամանակ, սրանք մի այլ կերպ կհղփանան ու կճնշեն ժողովրդին եւ կմարի քաղաքական դաշտը: Մեր կուսակցությունը կփոխի քաղաքական մթնոլորտը, որն իշխանության կողմից բնաջնջվել է: Չկա հավատ, չկա հույս, ոչինչ չկա: Այս հարկային դաշտը եւ ամեն ինչ հասարակ ժողովրդի վրա է, իսկ իրենք իրենց կոպեկին չեն ուզում կպնել, իրենք պետք է շուտափույթ հեռանան»,- ասաց ազատամարտիկը:
Սասուն Միքայելյանը, այնուամենայնիվ, նշեց, որ «Քաղաքացիական պայմանագիր» կուսակցության գերխնդիրը ոչ թե իշխանափոխությունն է, այլ իշխանության կողմից ստեղծված մթնոլորտի վերացումը:
«Մեր գերխնդիրն իշխանափոխությունը չէ, այլ իշխանության կողմից ստեղծված մթնոլորտը փոխելն է, սակայն եթե իշխանափոխություն չլինի, երբեք չհավատաք, որ այս երկրում ինչ-որ բան կփոխվի, որովհետեւ սրանք երբեք չեն գնա ինչ-որ համակարգային փոփոխության: Ես այս երկրի համար մեծ բան եմ արել, դրանք ո՞վ են եղել իրենց կյանքով մեկ, որ մեր ժողովրդի արյունը սենց խմում են: Մենք եկել ենք այս երկրում-ինչ-որ բան փոխելու, եւ թող ոչ մեկ չկասկածի՝ որ ներկայիս ռեսուրսներով մենք դա կանենք»,- ասաց Սասուն Միքայելյանը:
Ազատամարտիկը ավելացրեց, որ յուրաքանչյուր քաղաքացի ազատ է միանալու կուսակցությանը՝ ձեւավորելով մի կուռ կառույց, որը երկիրը կտանի դեպի իշխանափոխության:
Սասուն Միքայելյանը բացառեց ներկայիս ընդդիմադիր ուժերի հետ համագործակցությունը՝ ընդգծելով, որ ընդդիմադիր դաշտում եւս պետք է ձեւավորվեն նոր ուժեր, որոնց հետ գուցե կհամագործակցեն:
Նշենք, որ այսօր համագումարի սկզբին Նիկոլ Փաշինյանը հայտարարեց, որ «Քաղաքացիական պայմանագիր» միավորումը հիմնադրում է կուսակցություն, որը մտադիր է մասնակցել առաջիկա խորհրդարանական եւ նախագահական ընտրություններին:
