Իրանը կկառուցի Հայաստանի հետ սահմանին գտնվող 60 կմ երկարությամբ երկաթուղին։ Այս մասին իրանական ՖԱՐՍ գործակալությանը հայտարարել է Իրանում Հայաստանի դեսպան Արտաշես Թումանյանը։
Անդրադառնալով հայ-իրանական երկկողմ նախագծերին՝ դեսպանը նշել է, որ շարունակվում է Վրաստանի սահմանից Մեղրի ձգվող Հյուսիս-Հարավ ավտոմայրուղու շինարարությունը, որի շնորհիվ Հայաստանը կարող է Պարսից ծոցի շրջանը կապել Սեւ ծովին։
Հարցին, թե ինչն է խանգարում Իրան-Հայաստան երկաթուղու շինարարությանը, Թումանյանը նշել է. «Պետք է կառուցել մի քանի հարյուր կմ ձգվող երկաթգիծ, իսկ դրա համար միլիարդավոր դոլարների ներդրումներ են անհրաժեշտ։ Երբ որ լուծվի ֆինանսավորման հարցը, այն ժամանակ էլ կկառուցվի երկաթուղին։ Միաժամանակ ակնհայտ է, որ Իրանը պատժամիջոցների տակ է գտնվում, եւ ներկայումս Իրանի համար բարդ է սկսել երկաթուղու շինարարությունը»։
Անդրադառնալով Իրան-ԵՏՄ համագործակցության հեռանկարներին եւ ընդգծելով այդտեղ Հայաստանի դերը՝ դեսպան Թումանյանը ասաց. «Երեւանը ցանկանում է կապել Իրանն ու ԵՏՄ-ն, որի անդամները նույնպես շահագրգռված են Իրանի Իսլամական Հանրապետության հետ համագործակցելու հարցում»։
Իրանում Հայաստանւի դեսպանը նաեւ անդրադարձել է Մեղրիի ՀԷԿ-ի եւ երրորդ էլեկտրահաղորդման գծի շինարարության հարցին։ Նրա խոսքով երկու երկրների կառավարությունները բանակցում են էլեկտրահաղորդման գծի գործարկման եւ Մեղրիի ՀԷԿ-ի շինարարության հարցերով։ Դիվանագետը նշել է, որ էլեկտրահաղորդման գծի գործարկումից հետո Հայաստանը կմեծացնի Իրանից ներկրվող գազի քանակը։