Հայաստանը զբաղեցրել է 60-րդ հորիզոնականը կյանքի որակի վարկանիշում, որը կազմել է քաղաքներին եւ երկրներին նվիրված սպառողական կոնտենտի խոշորագույն բազան ՝ Numbeo-ն։

Հարեւան Վրաստանն ու Թուրքիան 57-րդ եւ 50-րդ տեղերում են, Ադրբեջանը վարկանիշում չկա։ Հայաստանն առաջ է անցել Ղազախստանից (63), Մոլդովայից (66), Ռուսաստանից (72) եւ Ուկրաինայից (75)։

Առաջին հնգյակում Շվեյցարիան, Գերմանիան, Շվեդիան, ԱՄՆ-ը եւ Ֆինլանդիան են։ 86 երկրների թվում վերջին տեղում է Վենեսուելան։

Կյանքի որակի ցուցիչը որոշվում է մի քանի չափորոշիչներով, այդ թվում սպառողական ընդունակության, բուժսպասարկման մակարդակով, սպառողական ապրանքների գներով, բնապահպանական վիճակով եւ անվտանգության մակարդակով։