Հունիսի 22–ի սցենարը կարծես թե կրկնվում է։ էլեկտրաէներգիայի թանկացման որոշումը չեղարկելու պահանջով Ազատության հրապարակից դեպի Բաղրամյան 26 շարժվող հազարավոր քաղաքացիներ Բաղրամյան պողոտայի սկզբնամասում կանգ առան` ընդհուպ մոտենալով վահաններով ու մահակներով զինված ոստիկանական շղթային։ Ի դեպ, Դեմիրճյան փողոցում եւ Բաղրամյան պողոտայում այսօր էլ նախորդ օրվա նման մեծ թվով ոստիկանական տեխնիկա է կանգնած` ջրցան մեքենաներ, զրահամեքենաներ։ (ֆոտոռեպորտաժ)
Տեսնելով մոտեցող ցուցարարներին` ոստիկանները սկսեցին մահակներով հարվածել վահաններին` նախազգուշացնելով, որ չմոտենան, ինչին ի պատասխան ցուցարարները սկսեցին աղմկել ու գոռալ` «ամոթ, ամոթ»։
Ցուցարարները հայտարարեցին, որ ոչ մի կոնտակտ չեն ունենալու ոստիկանության հետ:
Մինչեւ այդ մի քանի ցուցարար բանակցում էր Երեւանի փոխոստիկանապետ Վալերի Օսիպյանի հետ, սակայն ցուցարների շարքից մոտեցան, եւ խնդրեցին չբանակցել ցուցարարների անունից ոստիկանների հետ:
Օսիպյանը լրագրողներին ասաց, որ եթե օրենքը խախտվի, այսօր էլ ոստիկանությունը գործի կդնի անհրաժեշտ միջոցները` ցուցարարներին ցրելու համար. «Եթե լրագրողների նկատմամբ ոչ համաչափ գործողություն է եղել, ներողություն եմ խնդրում: Ոստիկանության պետի կողմից հրահանգ կա, բոլոր գործերով քննություն սկսել»,– ասաց Օսիպյանը` նշելով, որ իր տեղեկությունով բոլոր բերման ենթարկվածներն ազատ են արձակվել։
Բաղրամյան պողոտայում իրավիճակը թեժանում է: