Հայաստանի ոստիկանապետ Վլադիմիր Գասպարյանը ընդդեմ էլեկտրաէներգիայի թանկացման պայքարի շարունակությունը տեսնում է Ազատության հրապարակում։
Ոստիկանապետը քիչ առաջ այցելել է Ազատության հրապարակ, շրջել, պատասխանել լրագրողների եւ Բաղրամյան պողոտայից Ազատության հրապարակ տեղափոխված մի խումբ ցուցարարների հետ։ Նշենք, որ Ազատության հրապարակում մեծ լուսարձակով լույս են միացրել։
«Ազատության հրապարակում է լույսը, իսկ Բաղրամյանում մնացել է միայն պայքարի շունչը։ Ես գլխովս եմ պատասխանատու Ազատության հրապարակում գտնվող յուրաքանչյուրի համար։ Բաղրամյանում անառողջ մթնոլորտ է, որովհետեւ սոցիալական պահանջով պայքարի մեջ սողոսկել է քաղաքական պահանջ, այնտեղ քաղաքական կուսակցությունները փորձում են իրենց ճիշտը թելադրել, իսկ ճշտով շարժվում են միայն գողականները»,- ասել է Գասպարյանը՝ նշելով, թե բոլորն էլ գիտեն, թե ում նկատի ունի։
Նա նաեւ խոստացել է, որ այսօր ոստիկանները որեւէ գործողություն չեն իրականացնի Բաղրամյան պողոտայում գտնվող ցուցարարների դեմ, իր խոսքով, «կսպասեն՝ մինչեւ խմորումները տեղի ունենան, որովհետեւ տեսնում է, որ անհաշտություն կա պայքարողների միջեւ»։ «Ոստիկանությունն այսօր եւս հանդուրժողականություն է դրսեւորում, սակայն դա երկար տեւել չի կարող։ Հասարակական կարգը պետք է վերականգնել»,- նկատել է Գասպարյանը։
Նա նաեւ հայտարարել է, թե ընդդեմ էլեկտրաէներգիայի թանկացման պայքարը բոլորի, այդ թվում եւ իր սրտով է, որովհետեւ թանկացումը դիպչում էր բոլորի գրպանին։ «Ինչ-որ տեղ դա մեզ ավելի շատ էր պետք։ Դուք ձեր արդար գործով, սոցիալական խնդրով շատ բարի ու լավ գործ արեցիք»,- ասել է Գասպարյանը։