Իսրայելի պաշտպանության նախարար Էհուդ Բարաքն իր վրա է վերցրել մայիսին իսրայելական զինվորականների կողմից «Ազատության նավատորմի» վրա կատարված հարձակման պատասխանատվությունը: «Ես պատասխանատվություն եմ կրում ինձ ենթակա կառույցներում տեղի ունեցող ամեն ինչի համար: Ես պատասխանատվություն եմ կրում քաղաքական մակարդակով տրված հրահանգների համար»,- հայտարարել է Բարաքը:
Հիշեցնենք, որ մայիսի 31-ին իսրայելական զինվորականները հարձակվել էին «Ազատության նավատորմի» վրա, որը մարդասիրական բեռներ էր տեղափոխում Գազայի շրջափակված հատված: Հարձակման արդյունքում զոհվել էր 9 հոգի:
Իսրայելը անկախ հանձնաժողով է ստեղծել միջադեպի մանրամասները քննելու համար:
Օրերս մի հանձնաժողով էլ ստեղծել է ՄԱԿ-ը, որի կազմում ընդգրկված են Նոր Զելանդիայի նախկին վարչապետ Ջեֆրի Փալմերը, Կոլումբիայի նախկին նախագահ Ալվարո Ուրիբեն, եւ մեկական ներկայացուցիչներ Իսրայելից ու Թուրքիայից: