Ժամկետային զինծառայող 21-ամյա Մանուչար Մանուչարյանը ինքնասպանության օրը վատ տրամադրություն կամ արտառոց պահվածք չի ունեցել: Այս մասին այսօր՝ հունիսի 30-ին, Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում ցուցմունք տալիս ասաց գործով վկա, մահացածի ծառայակից 21-ամյա Լավրենտի Դավթյանը:
«Նորմալ տրամադրություն ուներ, արտառոց ոչ մի բան չեմ նկատել: Ինչպես միշտ հանգիստ ու հավասարակշռված էր»,-ասաց վկան:
Լավրենտի Դավթյանը վստահեցրեց, որ Մանուչար Մանուչարյանը դեպքից առաջ պահակակետը չի լքել, այլապես ինքն անպայման նկատած կլիներ նրան:
Վկայի խոսքով՝ դեպքի պահին ինքը հարեւան պահակակետում է եղել եւ երեք կրակոցի ձայն է լսել, որից հետո զանգել է պահակապետին եւ պատմել կատարվածի մասին:
«Պահակապետն ու նրա օգնականը եկան, բարձրացան դիտաշտարակ, էնտեղից ասեցին Մանուչարն ինքն իր վրա ա կրակել: Ես ոչինչ չեմ տեսել, միայն լսել եմ»,- ասաց վկան:
Տուժողի իրավահաջորդ Ռուբեն Մարտիրոսյանն ասաց, որ վկան սուտ ցուցմունք է տալիս, քանի որ 3 կրակոցից ավելի է եղել:
«Մենք անհերքելի փաստեր ունենք, որ ավելի շատ կրակոցներ են եղել: մանուչարի ոտքն էլ է հրազենային վնասվածք ստացել, շալվարն այդ տեղում ծակված է»,- ասաց Մարտիրոսյանը, որը նախազգուշացվեց ոչ ըստ էության հարցեր տալու եւ նիստի բնականոն ընթացքը խաթարելու համար:
Լավրենտի Դատվթյանը նշեց, որ ամբաստանյալներ Բաբկեն Գաբոյանը եւ Արման Ստեփանյանը արտոնյալ ծառայողներ չեն եղել եւ չեն ստորացրել ոչ Մանուչար Մանուչարին ոչ էլ որեւէ զինծառայողի, որքան էլ, որ մեղադրականի հիմքում ընկած է տուժողին ծաղրուծանակի ենթարկելու միջոցով նրան ինքնասպանության հասցնելը:
Հաջորդ նիստին՝ հուլիսի 31-ին, կհարցաքննվեն գործով մյուս վկաները:
Հիշեցնենք, որ ըստ մեղադրականի՝ ամբաստանյալներ Բաբկեն Գաբոյանը եւ Արման Ստեփանյանը «իրենց անառարկելի հեղինակությունն ամրապնդելու անձնական շահագրգռվածությունից ելնելով՝ կատարել են իրենց լիազորությունների և իրավունքների սահմաններից դուրս դիտավորյալ գործողություններ: Պարբերաբար բնույթ կրող ծեծի, ստորացումների, անձնական արժանապատվությունը նվաստացնող գործողությունների ու ծաղրի հետևանքով շարքային Մ.Մանուչարյանի մոտ զարգացել է սուր դեպրեսիվ հակազդում» ստեղծված իրավիճակից որպես անելանելի ընկալման զգացողությունով, արդյունքում, վերջինը 31.07.2013թ. ժամը 13.00-ի սահմաններում իրեն ամրակցված ԱԿՍ-74 տեսակի ինքնաձիգով ենթակզակային շրջանում կրակոց արձակելով գործել է ինքնասպանություն»:
Բաբկեն Գաբոյանին մեղադրանք է առաջադրվել ՀՀ քրեական օրենսգրքի 360 հոդվածի 2-րդ, 358.1 հոդվածի 4-րդ մասով, իսկ Արման Ստեփանյանին՝ 358.1 հոդվածի 4-րդ մասով: