Բաղրամյան պողոտայում, որտեղ այս պահին ընթանում է էլկտրաէներգիայի թանկացման դեմ բողոքի նստացույցը, քիչ առաջ երկու կանայք մի խումբ մանկահասակ երեխաների բերեցին:
NEWS.am-ի թղթակիցը հաղորդում է, որ շուրջ երկու տասնյակ երեխաներ պտտվեցին պողոտայով՝ երգելով Հայաստանի հիմնը: Նրանց ուղեկցող կանայք չցանկացան մեկնաբանել երեխաների այցը:
Բողոքի ակցիայի մասնակիցները երեխաներին ծափահարություններով ողջունեցին:
Նրանց մոտեցավ Երեւանի փոխոստիկանապետ Վալերի Օսիպյանը եւ զգուշացրեց, որ այդ քայլով իրենք սրում են իրավիճակը, եւ հորդորեց երեխաներին հեռացնել Բաղրամյան պողոտայից: Նա նշեց, որ երեխաներին այստեղ գտնվել չի կարելի:
Երեխաները շարք կազմած երգելով հեռացան:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
